भांगरभूंय | प्रतिनिधी
मंत्री सुभाष शिरोडकारः फाल्यांच्यान साळावली धरणाचें शेतांक उदक
भांगरभूंय । प्रतिनिधी
पणजी : उदकाचो उणाव पयस करपा खातीर धारबांदोडें म्हालांत 2 नवी धरणां बांदपाचो प्रस्ताव आसा. वर्सा भितर दोनूय धरणांचें काम सुरू जातलें. उदका पुरवण खात्याचे मंंत्री सुभाष शिरोडकार हांणी ही म्हायती दिली.
धारबांदोडें म्हालांत उदकाचो उणाव आसा. हो उणाव पयस करपा खातीर धरणांंची गरज आसा. तातोली आनी काजूमळ वाठारांत ही धरणां बांदतले. माती परिक्षणाचो वावर सुरू आसा. वर्सा भितर काम सुरू जातलें, अशें मंत्री सुभाष शिरोडकार हांणी सांगलें. ह्या धरणांतल्या उदकाचो शेती तशेंच पियेवपा खातीर उपेग जातलो.
शेती खातीर फावोश्या प्रमाणांत उदक उपलब्ध करपाचे सरकाराचे यत्न आसात. 14 नोव्हेंबर सावन धरणांतले उदक शेती खातीर सोडपाचें काम सुरू जातलें. 14 नोव्हेंबराक हणजुणें धरणाचें उदक सोडटले. केरी, पर्ये, मोर्ले हांगा हणजुणें धरणाच्या उदकाचेर शेती जाता. हेच दिसा पर्येत आजोबा देवस्थानांत शेतकारांंचो मेळावो जातलो. दुसरे दिसा 15 नोव्हेंंबराक साळावली धरणाचें उदक शेती खातीर सोडटले. तशेंच शेल्ड्यां शेतकारांंचो मेळावो जातलो. धरणांतल्यान उदक सोडले उपरांंत ते शेती वा बागायती मेरेन पावचे, म्हूण कानालांची दुरूस्ती केल्या.
चरावणें धरणांत उदकाचो सांठो वाडोवपा खातीर धरणाची दुरुस्ती करतले. ह्या धरणाची पळोवणी खात्याच्या अधिकाऱ्यांनी केल्या, अशें मंत्री शिरोडकार हांणी सांगलें.
उत्तर गोंयांतली शेती तिलारीच्या उदकाचेर निंबून आसा. बार्देस, पेडणें, दिवचल म्हालांत तिलारीचे उदक उपलब्ध जातलें. तिलारीच्या कानालांची दुरूस्ती मार्चात जावपाची शक्यताय आसा. सरकारान दुरुस्ती खातीर तिलारी म्हामंडळाक अजून मान्यताय दिवंक ना. उदकाच्या प्रमाणाचो विचार करून तिलारी धरणाच्या कानालांच्या दुरुस्तीक मान्यताय दितले.
साळांत उदकाचो उणाव पयस करपा खातीर 200 कोटी रुपया खर्चून बंंधारो बांंदपाचो प्रस्ताव आसा. ह्या उदकाचो वापर शेती खातीर जातलो.
फेब्रुवारी ते मे मेरेन उदकाचो उणाव पयस करपा खातीर आमठाणें धरणाच्या उदकाच्या पातळीची सेगीत देखरेख जातली. आमठाणें धरणाच्या उदकाची पातळी राखपाचे यत्न आसात.
20 तळ्यांची प्राधान्यान दुरुस्ती
उदका पुरवण खात्यान राज्यांतल्या तळ्यांची पळोवणी केल्या. 150 तळ्यांंची दुरुस्ती करपाची गरज आसा. हातूंतल्या 20 तळ्यांंची प्राधान्यान दुरुस्ती जातली. बोरी, करमळें, सायपे ह्या तळ्यांंची दुरूस्ती दोन म्हयन्यांत सुरू जातली. फेब्रुवारी उपरांत तळ्यांतलें उदक उणें जाता. दुरुस्ती खातीर फेब्रुवारी ते मे हो योग्य कालावधी आसता, अशें शिरोडकार हांणी सांगलें.
राज्यांतले 7 म्हाला शेतीप्रधान म्हाल आसा. शिरोडें मतदारसंघांत 3 हजारां वयर शेतकार आसा. सुशिक्षीत तरणाटे लेगीत आतां शेती कडेन वळपाक लागल्या. धरणाच्या उदकांतल्यान 4 हजार हेक्टर जमीन ओलिता खाला आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
