भांगरभूंय | प्रतिनिधी
पेडणें: दाडाचीवाडी धारगळे जाल्ल्या अपघातांत एका ट्रका पोंदां चिड्डिल्ल्यान कासीम भाट वझरेच्या चेतन सुभाष परब (19) हाका सुवातेचेरूच मरण आयलें. ह्या अपघातांत मोटरसायकलीचो खुर्दो जालो. तिडकल्ल्या लोकांनी ट्रक आडावन धरलो आनी कांय प्रमाणांत ट्रकाची मोडतोडूय केली. घडणुकेचे सुवातेचेर वेळार पुलीस पाविल्ल्यान वातावरण मातशें निवळ्ळें. हो अपघात 30 जुलयाक सांजेच्या पांच वरांच्या सुमाराक घडलो, अशी म्हायती पेडणेंचे पुलीस निरिक्षक दत्ताराम रावत हांणी दिली.
मेळिल्ले म्हायती प्रमाण चेतन परब हो धारगळ सुकेकुरण मार्गान वजरी पेडण्यां वतालो. मुखा वयल्यान आयिल्ल्या अवजड ट्रकान ताका धपको मारलो आनी टायरा वांगडा सुमार 10 मिटर मेरेन फरफटीत ओडीत व्हेलो. तातूंत चेतनाक सुवातेचेरूच मरण आयलें. एमएच 46 बीयू 0697 नंबराचो ट्रक उरफाटे दिशेंतल्यान येतालो.
अपघाताची म्हायती मेळटाच थळावे लोक घडणुकेचे सुवातेचेर पावले. ह्या अपघाताक कारण थारिल्ल्या ट्रकाचेर तिकडल्ल्या लोकांनी आपली तिडक काडली आनी ताची कांय प्रमाणांत मोडतोड केली. चेतन हो हालींच मोपा विमानतळाचेर कामाक लागिल्लो. शेनवारा तो रजा काडून मोटरसायकलीचें सर्व्हिसींग करपा खातीर वतालो. पूण धारगळे ताका अपघात जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
