भांगरभूंय | प्रतिनिधी
मडगांव, प्रतिनिधी: फातोर्डा मतदारसंघांतले सर्वधर्मीय लोक सर्वधर्मसमभाव भावना राखीत एकवटान रावतात. मारून कायदो हातांत घेवपाचो कोणाकूच हक्क ना. कांय जाणांक लागून धर्मीक वायटपणां निर्माण जाल्यार पुलिसांनी रोखडेंच अश्या घटकांचेर खर कारवाय करची. तांकां राजकी फाटबळ मेळपाक जायना अशें गोवा फॉरवर्डचे आमदार विजय सरदेसाय हांणी सांगलें.
नवोवाडो घोगळ हांगा घाणयार्या उदकाचीं पायपां घालपाच्या कामाचो आमदार सरदेसाय हांचे हस्तुकीं शुभारंभ जालो. ह्या वेळार हिंदू मसंडभूंयेंत कोयर उडोवपा वयल्या वादाचेर उलयतना तांणी, हिंदू मसंडभूंयेंत कोयर उडोवपा विशीं विचारलें तेन्ना हल्लो करपाचो प्रकार चुकिचो. हे घडणुकेचो निशेध करतां. कोणाकूच कायदो हातांत घेवपाचो अधिकार ना. फातोर्डा मतदारसंघांत सगळे जातीधर्माचे लोक एकवटान रावतात. कांय जाण अश्या मारामारीच्या घडणुकां वरवीं धर्मीक वायटपणा निर्माण करपाचो यत्न करतात. कांय थारावी समाजकंटकांक लागून समाजांतल्या सगळ्या धर्माच्या एकवटाक वेर वता. धर्मीक वायटपणा निर्माण करपी कोणाकूच राजकी फाटबळ दिवचें न्हय. पुलिसांनी असल्या व्यक्तींचेर खर कारवाय करची, अशी मागणी सरदेसाय हांणी केली.
नवेवाडो, घोगळच्या कांय घरांक घाणयार्या उदकाची जोडणी दिवंक ना. पयलीं घाणयार्या उदकाच्या पायपांचें काम करतले. उपरांत हांगचें फाटल्या कितल्याशाच वर्सां सावन आडखळून उरिल्लें रस्त्याचें काम करतले. हे खातीर सुमारे १६ लाखांचो खर्च करतले. घाणयार्या उदकाच्या कामा उपरांत रोखडेंच रस्त्याच्या कामाक सुरवात करतले. उपरांत ह्या वाठारांतल्या लोकांची घाणयार्या उदका विशीं आशिल्ली समस्या सुट्टली. तशेंच रस्त्याचें कामूय पुराय जातलें अशें आमदारान फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
