भांगरभूंय | प्रतिनिधी
-कायद्या प्रमाण खर कारवाय जातली : मुख्यमंत्री
पणजी : गोंयांत वा देशांत सगळ्या धर्माचे लोक रावतात. दर एकल्याक आपआपल्या देवांची पुजा करपाचो अधिकार आसा. कोणेंच हेर धर्मा विशीं वायट उतरां काडचीं न्हय. धर्मीक भावना दुखोवपा सारकीं विधानां सरकार हाचे मुखार सोंसून घेवचें ना. हिंदू आसूं वा ख्रिश्चन, दुसर्यांच्यो धर्मीक भावना दुखाेवप्यांचेर खर कारवाय सरकार करतले, अशी शिटकावणी मुख्यमंत्री डॉ. प्रमोद सावंत हांणी दिल्या.
आपल्या देवा विशीं वा धर्मा विशीं दर एकल्याक आदर आसता. हाचो अर्थ दुसर्यांच्या धर्मा विशीं अनादर आसपाक जायना, अशें मुख्यमंत्र्यांनी म्हणलें. डाॅ. सावंत हांच्या मतांक भौशीक बांदकाम मंत्री निलेश काब्राल हांणी लेगीत तेंको उक्तायला.
हेर धर्मा विशीं कोणूय कितेंय उलयतात. हो प्रकार हालीं खुबूच वाडपाक लागला. हाचे फुडें सरकार असले प्रकार सोंसून घेवचे ना. अशा प्रकारांक लागून समाजांतली शांतीकाय इबाडपाचो धोको आसता, अशें काब्राल हांणी सांगलें.
गोंयांत सर्वधर्म सहिष्णूता आसा. सगल्या जाती-धर्माचे लोक गोंयांत एकोप्यान नंदतात. अशें परिस्थितींत एकामेकांच्या धर्माचेर विधानां करून गोंयांतली धर्मीक सहिष्णूता इबाडप चुकीचे. हाचे पयलीं अशें वर्तन करपी कांय जाणांचेर कारवाय जाल्या. हाचे मुखार अशीं कृत्यां सरकार सोंसून घेवचे नात, अशें मंत्री निलेश काब्राल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
