भांगरभूंय | प्रतिनिधी
उदय डांगी: कुंडय भौशीक गणेशोत्सवाच्या अहवाल पुस्तिकेचें प्रकाशन
फोंडें: समाजा खातीर आमचेर बंधनां आसूंक जाय. ते खातीर आमी समाजाच्या रिणांत उरतले आनी बरे तरेन समाजसेवा करूंक शकतले. धर्मीक कार्या बरोबरूच समाजकार्याची मोख दवरून कार्य करूंक जाय अशें उलोवप समाजसेवक आनी धेंपो बोट बांदणी उद्देग समुहाचे निवृत्त वेवस्थापक उदय डांगी हांणी केलें.
कुंडय भौशीक गणेशोत्सव मंडळा वतीन मंडळाच्या सभाघरांत आयोजीत केल्ल्या 2022-23 अहवाल पुस्तिकेचें विमोचन केले उपरांत डांगी उलयताले.
कुंडय भौशीक गणेशोत्सव मंडळाचें कार्य खूबशा वर्सां सावन सुरू आसा आनी प्रामाणीक सेवाभाव सांबाळटात. खूबशे समाजीक उपक्रम विवीध कार्यावळींतल्यान जायत आसतात अशें तांणी मुखार उलयतना म्हणलें.
सुसंस्कृत समाज निर्माण करपा खातीर भौशीक गणेशोत्सव मंडळ मोटो हातभार लायता. गणेशोत्सवाक लागून लोकां मदीं एकवट, भावपण वाडीक लागपाक मजत जाता अशें डांगी हांणी म्हणलें.
ह्या वेळार माचयेर गणेशोत्सव मंडळाचे अध्यक्ष नागेश फडते, सचीव आनी कुंडयचे सरपंच सर्वेश जल्मी, उद्देजक प्रशांत फडते, मंडळाचे आदले अध्यक्ष संजय भंडारी हाजीर आशिल्ले.
ह्या वेळार प्रास्तावीक करतना संजय भंडारी हांणी म्हणलें, कुंडय भौशीक गणेशोत्सव मंडळ हें एक आदर्श मंडळ आसून ग्रामस्थां खातीर सगल्या कार्यकारिणी वांगड्यांच्या सहकार्यान फाटलीं खूबशीं वर्सां विवीध समाज उपेगी उपक्रम राबयता. धर्मीक कार्या बरोबरूच समाजीक कार्या खातीर कुंडय गणेशोत्सव मंडळ मुखार आसा. ह्या मंडळाची हेरांनी देख घेवन कार्य करूंक जाय.
सुरवेक संजय भंडारी हांणी येवकार दिलो. कार्यावळीचे मुखेली शांतो गणेश नायक हांणी सुत्रसंचालन केलें आनी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
