भांगरभूंय | प्रतिनिधी
आदी ब्रिगेडीयरः धनगर- एसटी मदीं झगडीं लावपाचो यत्न चलिल्ल्याचो दावो
भांगरभूंय । प्रतिनिधी
मडगांवः गावडी, कुणबी, वेळीप समाजाक 2003 त एसटीचो दर्जो मेळ्ळो. ते उपरांत धनगर समाज संघटणेंतल्यान भायर आशिल्लो. 2011 च्या आंदोलनांतूय तांणी वांटो घेवंक नाशिल्लो. राजकी राखिवतेचो लडो लेगीत गावडी, कुणबी, वेळीप समाजांनी लडला. आतां ताका येस मेळटा हे खातीर राजकी फायद्या खातीर धनगर समाजाक एसटी दर्जो दिवपाचो यत्न चल्ला. हाका आमचो विरोध आसतलो, अशें पत्रकार परिशदेंत ‘आदी ब्रिगेडीयर’च्या विनय वेळीप हांच सयत केपेंच्या एसटी भावांनी सांगलें.
धनगर भावांनी आमदार एल्टन डिकॉस्टा हांचे आड घेतिल्ले पत्रकार परिशदेक जाप दिवचे खातीर केपेंच्या एसटी समाज भावांनी पत्रकार परिशद घेतली आनी धनगर समाजाक एसटी दर्जो दिवपाक विरोध आशिल्ल्याचें मत मांडलें. विनय वेळीप, हांचे सयत सरपंच अश्विनी गांवकार, मालू वेळीप, दत्ता वेळीप, सर्वानंद वेळीप, श्वेता गांवकार ह्या वेळार हाजीर आशिल्ली.
विनय वेळीप हांणी सांगलें, आदिवासी समाजाच्या मंत्री आनी आमदारांनी लेगीत राजकी राखिवता मेळटली, अशें सांगलां. आदिवासी समाजा खातीर आशिल्लो अडेज हजार कोटींचो निधी खर्च केल्लो ना. कायद्यांत बसनासतना पर्याय उपलब्ध करून एसटी दर्जो दिवचो न्हय. ना जाल्यार हेर समाज लेगीत अशेच तरेन एसटी दर्जो मागतले. मिशन पॉलिटीकलांतल्या 16 संस्थां मदली आदी ब्रिगेडीयर ही एक संस्था आसा. महाराष्ट्रांतल्या आदिवासी समाजा कडल्यान हेर समाजाक एसटी दर्जो दिवपाक विरोध जाता. गोंयांत लेगीत आमचो विरोध आसा. हे विशीं मिशन पॉलिटीकलचे फुडले बसकेंत मत मांडटले आनी कोण कोण हे मागणेक तेंको दितात, तें स्पश्ट जातलें, अशें तांणी सांगलें.
हे आदीं 20 वर्सां आमदार आशिल्ल्यांनी समाजाचे प्रस्न सोडयनासतना फक्त राजकारण केलें. आतां धनगर समाज आनी एसटी समाजांत झगडीं लावपाचो यत्न चल्ला. धनगर समाजाक आदिवासी समाजांत आस्पावीत करून घेवपाक आमचो विरोध आसा. आदिवासी समाजान झगडून जी राखिवता मेळयल्या तातूंत हेर समाज जबरदस्तीन घुसपाक शकना. कायद्यान जें कितें जाता तें जावंदी, पूण ताका आमचो विरोध हो आसतलोच, अशें विनय वेळीप हांणी सांगलें.
एसटी समजा कडल्यान 2011 त चार मतदारसंघ राखीव करपाची मागणी केल्ली. आतां एसटी समाजाक राजकी राखिवता मेळटली हाका लागून राजकारणाचें व्यसन आशिल्ले कांय जाण हाचो फायदो घेवपाक सोदतात. आमदार एल्टन डिकॉस्टा हांणी आमदारकी मेळत सावन आदिवासी समाजाचे साबार प्रस्न सरकारा कडेन, विधानसभेंत मांडल्यात. तांची फाटपुरवण केल्या. तांचेर कोणूय टिका केली जाल्यार ढाल जावन तांची राखण करतले, अशेंय विनय वेळीप हांणी सांगलें.
बाळ्ळीच्या लड्या वेळार आदिवासी समाजाच्या दोगा तरणाट्यांक जीव वगडावचो पडलो, त्या वेळार चंद्रकांत कवळेंकार खंय आशिल्लो? भाजपाची कसलींच तत्वा कवळेंकार पाळिना. लोकसभा वेंचणुकेचे फाटभुंयेर पयशे वांटून लोकांक लागूं करपाचें काम चालू आसा. राजकी फायद्या खातीर धनगर समाजाचो एसटींत आस्पाव करचे खातीर तांणी यत्न चलयल्यात. धनगर समाजाक एसटी दर्जो दिवपाक आमचो खर विरोध आसा, अशें दत्ता वेळीप हांणी सांगलें.
आंदोलना वेळार धनगर फुडारी खंय आशिल्ले?: विनय वेळीप
धनगर भावांक चुकीची म्हायती दिवन तांकां पत्रकार परिशद घेवपाक लायल्या. आमदार एल्टन डिकॉस्टा हांणी सांगिल्ले गजालींचो आपल्याक जाय तसो अर्थ काडला. आमदार डिकॉस्टा कोणाकूच उद्देशून उलोवंक नाशिल्ले, जाल्यार तांणी गजालीचो एक भाग सांगिल्लो. धनगर समाजाच्या फुडाऱ्या कडल्यान लोकसभेचे फाटभुंयेर समाजांत फूट घालपाची खटपट चालू आसा. गावडा, कुणबी, वेळीप हांकां एसटीचो दर्जो मेळ्ळा, पूण धनगर समाजाक तो मेळूंक ना. 2011 त आंदोलन केल्लें तेन्ना धनगर समाजाचे फुडारी खंय आशिल्ले, असो प्रस्न विनय वेळीप हांणी उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
