भांगरभूंय | प्रतिनिधी
प्रधानमंत्र्यांनी भेटयलीं परबीं; यशवंत सिन्हांची हार
खबरां संस्था
नवी दिल्लीः देशांत सोमारा जाल्ले राष्ट्रपतीपदाचे वेंचणुकेंत एनडीएची उमेदवार द्रौपदी मुर्मू जैतिवंत जाल्यात. यूपीएचे उमेदवार यशवंत सिन्हा हारल्यात. हे वेंचणुके खातीर 99 टक्के लोकप्रतिनिधींनी मतदान केलें. देशांतलीं 10 राज्यां आनी एका केंद्रशासीत प्रदेशांत 100 टक्के मतदान जालें. राष्ट्रपतीपदा खातीर 771 खासदार आनी 4025 आमदारां सयत 4796 मतदारांनी मतदान केलें. मतमेजणेचे पयले फेरये पसुनूच मुर्मू आघाडीचेर आशिल्ल्यो. तिसरे फेरये मेरेन मुर्मू हांकां वैध मतांतल्यान 50 टक्के मतां मेळ्ळीं.
देशाची दुसरी महिला राष्ट्रपती जावपाचो भोवमानराष्ट्रपतीपदाचे वेंचणुकेंत बरीच चुरस निर्माण जाल्ली. चडांत चड तेंको मेळचो म्हूण मुर्मू आनी यशवंत सिन्हा हांणी देशभर भोंवडी केल्ली. मात हे वेंचणुकेंत मुर्मू हांणी जैत मेळयलें. ह्या जैता सयत मुर्मू हांणी देशाच्यो दुसऱ्यो महिला राष्ट्रपती जावपाचो भोवमान मेळयलो. त्यो 25 जुलयाक राष्ट्रपतीपदाचो पदभार स्विकारतल्यो. हाचे पयलीं प्रतिभाताई पाटील हांकां पयलो महिला राष्ट्रपती जावपाचो मान मेळिल्लो.
मतमेजणेक सुरवात जाले उपरांत सुरवाती पसुनूच द्रौपदी मुर्मू आघाडीचेर आशिल्ल्यो. दुसरे फेरयेंत 812 मतांच्या फरकान आघाडीचेर आशिल्ल्यो. दुसरे फेरयेंत तांकां 1349 मतां मेळ्ळीं. ह्या मतांचें मोल 4,83,299 आसा. जाल्यार दुसरे फेरयेंत सिन्हा हांकां 537 मतां मेळ्ळीं. ह्या मतांचें मोल 1,89,876 आसा.17 खासदारांची मतां
फुटलीं
तिसरे फेरयेंत मुर्मू हांकां 812 मतां, जाल्यार सिन्हा हांकां 521 मतां मेळ्ळी. मतमेजणेचे तिसरे फेरये मेरेन 3219 मतां वैध थारली. ह्या मतांचें मोल 8,38,839 इतले आसा. जाल्यार सिन्हा हांकां 1058 मतां मेळ्ळीं. ह्या मतांचें मोल 261052 आसा. म्हणल्यार तिसरे फेरये मेरेन वैध मतांतल्यान 50 टक्क्या परस चड मतां मुर्मू हांकां मेळ्ळीं.
राष्ट्रपतीपदाचे वेंचणुकेंत वट्ट 17 खासदारांचीं मतां फुटलीं. ह्या खासदारांनी एनडीएची उमेदवार द्रौपदी मुर्मू हांचे वटेन मतदान केलें. ताका लागून मुर्मू निमाणे मेरेन आघाडीचेर अाशिल्ल्यो आनी तांकांच जैत मेळ्ळां.
मुर्मू हांचें जैत लोकशाये खातीर शुभ संकेतः मोदी
जैता उपरांत प्रधानमंत्री नरेंद्र मोदी हांणी मुर्मू हांची भेट घेवन तांकां परबीं भेटयलीं. तशेंच मुर्मू हांकां तेंको दिल्ले खातीर तांणी सगल्या लोकप्रतिनिधींचे उपकार मानले. द्रौपदी मुर्मू ह्यो उत्कृश्ट आमदार आनी मंत्री आशिल्ल्यो. झारखंडाची राज्यपाल म्हूण तांचो कार्यकाळ अभिमानाचो आशिल्लो. हाचे मुखार त्यो देशाचें फुडारपण करतल्यो आनी भारताचो विकास प्रवास अदीक घटमूट करपाक मजत करतल्यो. तांचें जैत हें लोकशाये खातीर बरो संकेत आसा, अशें प्रधानमंत्री मोदी हांणी म्हणलें.
गोंयांतल्यान मुर्मू हांकां 28 मतां
विरोधी पक्षाच्या तीन आमदारांचे ‘क्रॉस वोटींग’
पणजी : राष्ट्रपतीपदाचे वेंचणुकेंत ‘एनडीए’ची उमेदवार द्रौपदी मुर्मू हांकां गोंयांतल्यान 28 मतां मेळिल्ल्याचे मुख्यमंत्री डॉ. प्रमोद सावंत सांगलें. हाचे वयल्यान विरोधी पक्षांतल्या तीन आमदारांची मतां फुटिल्ल्याचे स्पश्ट जाता. गोंयांतल्या चाळीसूय आमदारांनी राष्ट्रपतीपदाचे वेंचणुके खातीर मतदान केलें. हातूंत भाजपाच्या 20, काँग्रेसीच्या 11, आप आनी मगोच्या दोन, गोवा फॉरवर्ड आनी रिव्हॉल्यूशनरी गोवन्सच्या दरेकी एक तशेंच तीन अपक्ष आमदारांचो आस्पाव आसा. भाजपाक मगोच्या दोन आनी तीन अपक्षांचो तेंको आसा. ते खातीर भाजपाचे संख्याबळ 25 आशिल्ल्यान मुर्मू हांकां गोंयांतल्यान 25 आमदारांची मतां मेळटली अशें दिसताले. पूण प्रत्यक्षांत तांकां 28 मतां मेळिल्ल्यान विरोधी पक्षाच्या तीन आमदारांनी ‘क्रॉस वोटींग’ केल्ल्याचे सिद्ध जाता. यशवंत सिन्हा हांकां गोंयांतल्या 12 आमदारांचीं मतां मेळ्ळीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
