दोन वेंचणुकांनी ‘क्रॉस वोटिंग’ : विरोधक फेल

भांगरभूंय | प्रतिनिधी

अमर पाटील

75074 95151 

राष्ट्रपती वेंचणुकेंत देशभर क्रॉस वोटिंगाक लागून द्रौपदी मुर्मू विक्रमी 64 टक्के मायज मतां घेवन जिखली. राष्ट्रपती वेंचणुकेंतल्यान विरोधक एकठांय ना म्हूण स्पश्ट दिसून आयलें. प्रधानमंत्री नरेंद्र मोदींचें ल्हार अजूनय देशभर आसा आनी विरोधक तातूंत व्हांवन वतात, अशें चित्र दिसून येता. 

आसामांत 22, मध्य प्रदेशांत 19, महाराष्ट्रांत 16, उत्तर प्रदेशांत 12, गुजरातांत 10, झारखंडांत 10, बिहारांत 6, छत्तीसगढांत 6, राजस्थानांत 5 आनी गोंयांत 3 आमदारांनी क्रॉस वोटिंग केला. त्या भायर 1 टक्के मोदीविरोधी आमदार- खासदारांनी मतदानूच करूंकना. सगळे चित्र पळयल्यार बीजेपी सरकार स्थिरतेच्या न्ही तर एकाधिकारशाहीचे दिशेन वता म्हूण स्पश्ट जाता.

महाराष्ट्रांत 16 आमदारांचें क्रॉस वोटिंग जातलें हें स्पश्टूच आशिल्लें. राष्ट्रपतीचे वेंचणुके आदीं महाराष्ट्रांत मोठ्यो राजकी घडामोडी जाल्यो. शिवसेनेचो एक गट फुटून बीजेपीक तेंकों दिवपाक म्हूण गेलो आनी बीजेपीचो तेंको घेवन सरकार घडयलें. ह्या गटाचो बीजेपीच्या उमेदवाराक तेंकों आसाच म्हूण सगळ्यांकूच खबर आशिल्लीं. मात, देशाच्या बाकीच्या वाठारांनी जें क्रॉस वोटिंग जालें ते पळयल्यार बीजेपी आपली पाळांमुळां त्या – त्या राज्यांनी घटमूट करता म्हूण सिद्ध जालां.

गोंयांतूय राष्ट्रपती वेंचणुके पयली खूप घडामोडी जाल्यो. काँग्रेसीचो एक गट फुटून बीजेपींत वता म्हूण बोवाळ पडिल्लो. काँग्रेसीच्यो 2 दीस डॅमेज कंट्रोला खातीर बसकांचेर बसका जाल्यो.  काँग्रेसीचो एक गट मुख्यमंत्र्याच्या बंगल्यारूय बसून आयलो. 8 जाण बीजेपींत वतात आनी काँग्रेसीचो आंकडो तिनार पावता अशी परिस्थिती निर्माण जाल्ली. काँग्रेसीन परिस्थिती 

बरेपैकी हाताळटना बंडखोरांचो पयलीं आठाचो आंकडो पांचार हाडलो. पत्रकार परिषद घेवन काँग्रेस खंयचे परिस्थितींतल्यान वतां तेंय सांगलें. बीजेपीतल्यान काँग्रेसींत आयिल्लो मायकल लोबो आनी काँग्रेसीचो खांपो फुडारी दिगंबर कामत पक्षाआड कारस्थान करता म्हूण आरोप केले. ह्या दोगांआड कारवायेकूय सुरवात केली. हें करता म्हणसर काँग्रेसीन आनीक दोन आमदारांक आडोवन धरपाक येस मेळयलें. मायकल आनी दिगंबर कामत आतां काँग्रेसी आड म्हूण चित्र स्पश्ट जाल्ले. 

दिगंबर कामतीन आपूण पक्षाचोच म्हूण भूमिका स्पश्ट करतना आपल्या विरोधी पक्ष फुडारी करूंकना, नव्याक केलो, आपल्याक कुशीक वडयलो अशें संकेत दिले. आपणें पक्ष विरोधी कारवाय करूंना अशी तांची भूमिका. वेंचणुके आदीं मुख्यमंत्री पदाचो उमेदवार जाहीर करूंकना, उपरांतूय आपल्याक विरोधी पक्षफुडारी म्हूण काडलो. निर्णय घेतना आपल्याक विचारूंना म्हूण तांचो आरोप आशिल्लो. ह्या आरोपांक काँग्रेसीचे गोंय प्रभारी दिनेश गुंडू रावान दिगंबरा कडच्यान ही अपेक्षा नासली म्हूण नाराजी उक्तायली. काँग्रेस जिखिल्ली जाल्यार आपूणच मुख्यमंत्री आसपाचो, हेंय ते उलोवन गेले. ह्या सगळ्या घडामोडींवेल्यान दिगंबर कामत वा मायकल लोबो हांकां आतां आनीक काँग्रेसींत तशी मानाची सुवात नासतली हें स्पश्ट आशिल्लें. 

हें सगळें घडटा म्हणसर विधानसभा अधिवेशन सुरू जालें. अधिवेशनांत काँग्रेस कांयच जावंक ना अशें दाखोवन एकठांय रावन मुद्दें मांडटा. ताचेर आपाच्या वॅन्झीन कितें फकांडां चल्ल्यां, लोकशाहीची हत्त्या जाता. काल झगडटाले, आयज एकठांय. आमी दोगांनी कितें करपाचें असो थोमणोय मारलो. बीजेपीची बी टीम कोण, हो वाद हे घडणुकेंतल्यान परत पेट्टा म्हूण दिसपाक लागलें.

राष्ट्रपती वेंचणुकेचे मतदाना वेळार गोवा फॉरवर्डाचो आमदार विजय सरदेसायान सध्या चल्लां तें पळयल्यार क्रॉस वोटिंग जातलेच म्हूण दावो केलो. आपाच्या केंद्रीय समितीन द्रौपदी मुर्मूविशीं आदर आसा, मात तेंकों यशवंत सिन्हाकूच म्हूण जाहीर केल्ले. ते फांटभुयेर गोंयच्या दोनूय आमदारांनी सिन्हाकूच मत म्हूण जाहीर केल्ले. आरजीच्या विरेशान सरकारान आपलो तेंकों मागूंकना म्हूण सांगून आपली भूमिका जाहीर केल्ली. 

राष्ट्रपती वेंचणुकेचो निकाल लागलो आनी गोंयांत तिगां विरोधकांनी सरकार पक्षा खातीर मत मारला म्हूण स्पश्ट जालें. 25 सरकार पक्षाची, 3 विरोधकांचीं मेळून 28 आमदारांची, तशेंच बीजेपीच्या 2 खासदारांची मतां मुर्मूक पडली. ही 3 मतां कोणाची कांय म्हूण तेन्ना सावन तर्कवितर्क चालू आशिल्लो. चडश्या जाणांक मायकल लोबो, ताची घरकान्न डिलायला आनी दुखावल्ले दिगंबर कामत हांचीच आसतलीं म्हूण दुबाव. तातूंत लोबो आनी तांचे घरकान्नीन, तशेंच एकवेळ विजयानूय मारलां आसत म्हूण कांय जाणांक दुबाव. ही 3 मतां कोणाची हो एक हॉट इश्यू जावन उरलो. 

तातूंतच उपसभापती वेंचणुके खातीर काँग्रेसीन शॉकिंग खबर दिली, ती म्हणल्यार उमेदवार म्हूण डिलायलाचें नांव मुखार येवप. मायकलाचेर कारवाय, ताचेर आरोप, क्रॉस वोटिंगाचो दुबाव, हे फांटभुयेर डिलायलाक उमेदवारी म्हणल्यार चल्लां कितें? हो प्रस्न सगळ्यांकूच पडलो. डिलायलाक उपसभापती करपा खातीर बीजेपीन चाल खेळ्ळ्या कांय कितें असोय प्रस्न पडपाक लागिल्लो. मात, अपेक्षे प्रमाण जोश्युआ उपसभापती जालो. मात हे वेंचणुके वेळारूय वाद वयर सरलो. आम आदमी पार्टी आनी आरजीन मतदानूय करूंक ना. उपसभापती वेंचणुके वेळार 3 मतां उणी. राष्ट्रपती वेंचणुकेवेळारूय 3 मतां उणी. काँग्रेसीन सोमतो हो आंकडो एकठांय हाडून राष्ट्रपती वेंचणुकेवेळार क्रॉस वोटिंग जाल्ल्या 3 मतांक उपसभापतीक व्हरून चिकटायली. तें 3 कोण ते गोंयकारांक कळ्ळें, आप का बीजेपी परिवार म्हूण अमित पाटकारान ट्विटूय केलें. ह्या ट्विटा वेल्यान विरोधकां मदी आशिल्लो ‘एकचार’ परत उक्ताडार आयलो. 

आपाचे केंद्रीय समितीन राष्ट्रपतीचे वेंचणुके वेळार भूमिका कितें तीं स्पश्ट केलां आनी आमच्या आमदारांकडेन कोणी बोटां दाखोवपाची गरज ना. हें कर्म काँग्रेसीचेंच, तांणी तांच्या आमदारां कडेन लक्ष दिवचें म्हूण गोंय आपान ट्विटाक जाप दिली. काँग्रेसीचें कांय धड ना, तांचेच फुटल्यात म्हूण दावो करतना बीजेपीचे बी टिमीचो वादूय भायर काडलो. 

दुसरे वटेन आरजीन आपली बाजू मांडटना डिलायलाक मत दिल्लें जाल्यार तें खंय मेरेन पावतलें हाची शाश्वती ना म्हूण रजांव दिलें. फाल्या डिलायला बीजेपींत गेली जाल्यार आरजीन तिका तेंको दिल्लो म्हूण सगळे जाण म्हण्टले, ताका लागून आमी मेरेर रावले म्हूण आरजी विरेश बोरकारान स्पश्ट केले. 

ह्यो सगळ्यो गजाली पळयल्यार बीजेपीक उमाळे फुट्टलेच. विरोधकां मदींच एकचार ना जाल्यार सरकारा आड लडटलो कोण. एकामेकां वांगडा झगडूंकूच शक्त सोंपपाक लागल्या. ही गजाल फकत गोंयांतूच न्ही तर बाकीच्या राज्यांनीय घडपाक लागल्या. मोदीचे बीजेपी आड लडटलो जाल्यार सक्षम विरोधक जाय, सध्या तेंच ना. सक्षम विरोधक नाशिल्ल्यान सरकार घेता तो निर्णय ‘फायनल’, मागीर तो बरोबर आसूं वा चुकीचो, कोणाक कांय पडिल्लें ना, आनी जांकां पडलां, तांचें बळ ना अशीच परिस्थिती आसा. 

गोंयांतल्या राष्ट्रपती वेंचणुके वेळारची 3 मतां आनी उपसभापती वेंचणुकेवेळारची 3 मतां एकांमेकां कडेन संबंद दवरून आसा कांय ना हो वादाचो मुद्दो. उपसभापती वेंचणुके वेळार आप आनी आरजीन मत मारूंना हें स्पश्ट. मात, राष्ट्रपती वेंचणुके वेळारची 3 मतां कोणाची हें ‘गुपीत’. काँग्रेसीन आपलो पक्ष फुटूंना हें दाखोवपा खातीर वांगडी विरोधकांचेर आरोप केला काय, तांच्या दाव्यांत तथ्य आसा, हें कळपाक तसो मार्ग ना. मात, काँग्रेसीच्या ह्या आरोपांक लागून भविश्यांत तांची ‘एकला चलो रे’ अशीच परिस्थिती आसतली हें मात स्पश्ट.