दोन म्हयन्या उपरांत 8 आमदारां आड अपात्रताय याचिका

भांगरभूंय | प्रतिनिधी

गिरीश चोडणकार, डॉम्नीक नोरोन्हा हांच्यो याचिका

पणजी : भजपांत प्रवेश केल्ल्या 8 आमदारां आड सभापतीं कडेन दोन वेगळ्योवेगळ्याे याचिका दाखल जाल्यात. प्रदेश काँग्रेसीचे आदले अध्यक्ष गिरीश चोडणकार आनी डॉम्नीक नोरोन्हा हांणी ह्यो याचिका घाल्यात. काँग्रेस पक्षा वतीन येता त्या सप्तकांत अपात्रताय याचिका दाखल जातली, अशी म्हायती आमदार कार्लुस फरेरा हांणी दिली.

आपले कचेरेंत दोन वेगळ्योवेगळ्यो याचिका दाखल जाल्यात. ह्या याचिकांचेर अभ्यासा उपरांत सभापती कचेरी विचार करतली अशी म्हायती सभापती रमेश तवडकार हांणी दिली. सभापती कडेन आमदार सोडून हेर व्यक्ती अपात्रताय याचिका दाखल करूंक शकतात काय? असो प्रस्न ह्या याचिकां विशीं उपस्थीत जाला. सभापती रमेश तवडकार हांणी हे विशीं कसलेंच उलोवप करूंक ना. हाचे पयलीं काँग्रेसीच्या धा आमदारांनी भाजपांत प्रवेश केल्लो. ह्या धा आमदारां आड प्रदेश काँग्रेसीचे तत्कालीन अध्यक्ष गिरीश चोडणकार हांणी याचिका घाली. हाचेर सुनावणी जाली आनी निकाल जाहीर जालो. गिरीश चोडणकार हे तेन्ना आमदार नाशिल्ले. तरी तांचे अपात्रताय याचिकेचेर सुनावणी जावन निर्णय जालो. काँग्रेस पक्षाचो अपात्रताय याचिकेचो मसुदो तयार आसा. पक्ष बेगिनूच याचिका दाखल करतलो अशें आमदार अॅड. कार्लुस फरेरा हांणी सांगलें.

अपात्रताय याचिके विशीं म्हायती दिताना अॅड. क्लिओफात कुतिन्हो हांणी लेगीत आमदार सोडून हेरांक याचिका दाखल करपाक मेळटा अशें मत उक्तायलें.

फाटल्या वेळार प्रदेश काँग्रेसीचे अध्यक्ष ह्या नात्यान गिरीश चोडणकार हांणी याचिका दाखल केल्ली. ते आमदार नासले. आपलो पक्ष फुटूंक ना. ही फूट दाखोपाचो निर्णय बेकायदाे आसा, असो दावो अध्यक्ष ह्या नात्यान तांणी केल्लो. आतां गिरीश चोडणकार हे अध्यक्ष नात. तरी ते काँग्रेस पक्षाचे वांगडी आसात. आपलो पक्ष फुटूंक ना. आठ आमदारांचो भाजप प्रवेश बेकायदाे आसा असो दावो पक्षाचो वांगडी हे नात्यान करप तांकां शक्य आसा. फाटल्या वेळार आमदार सोडून हेर व्यक्तींनी याचिका दाखल केली असो आक्षेप लेगीत प्रतिवाद्यांनी घेवंक नाशिल्लो. हे खेपे आक्षेप घेतलो जाल्यार लेगीत ताचेर सुनावणी जातली, अशी म्हायती नामनेचे वकील क्लिओफात कुतिन्हो आल्मेदा हांणी दिली. हाचे पयली बऱ्याच आमदारांनी पक्षांतरां केल्यांत. तांचे आड अपात्रताय याचिका दाखल जाल्या. निकाल पक्षांतर केल्ल्या आमदारां वटेन लागलो. तरी लेगीत दर खेपे परिस्थिती वेगळी आसता. सभापती तशेंच न्यायालयां कितें निवाडो दिता? वा कितें भाश्य करता? हें पळोपाक जाय. पक्षांतर बंदी कायद्यात सुदारणा जावपाक जाय अशें सर्वोच्च न्यायालयान हाचे पयलीं म्हणलां अशें अॅड. क्लिओफात कुतिन्हो हांणी म्हणलें.

दिगंबर कामत, मायकल लोबो, संकल्प आमोणकार, अलेक्स सिक्वेरा, रुडॉल्फ फर्नांडीस, केदार नायक, डिलायला लोबो आनी राजेश फळदेसाय हांणी 14 सप्टेंबराक काँग्रेस पक्ष सोडून भाजपांत प्रवेश केल्लो. राहुल गांधी हांणी भारत जोडो यात्रा सुरू केली तेन्नाच गोंयांत हो भुंयकांप जाल्लो. हे घडणुकेक आयज दोन म्हयने पुराय जातात. दोन म्हयने पुराय जावपाचे फाटभुंयेर अपात्रताय याचिका दाखल जाल्या. ही याचिका पक्षा वतीन दाखल जावंक ना.

गिरीश चोडणकार हांणी जी याचिका दाखल केल्या, ते विशीं आमकां कसलीच कल्पना ना, अशें आमदार कार्लुस फरेरा हांणी सांगलें. याचिका दाखल करपा खातीर कागदपत्रां तशेंच म्हायती घेवप आवश्यक आसता. म्हायती हक्क कायद्या खाला म्हायती मेळपाक उशीर जालो. हाका लागून याचिका दाखल करपाक उशीर जावप शक्य आसा, अशें अॅड कार्लुस फरेरा हांणी सांगलें.