भांगरभूंय | प्रतिनिधी
मंत्री गुदिन्हो हांची लेखी जापेंत म्हायती
भांगरभूंय । प्रतिनिधी
पणजीः गोंय उद्देगीक विकास म्हामंडळान (जीआयडीसी) विशेश अर्थीक मळ (एसआयझेड) येवजणे खाला दिल्ली 24,05,441 चौखण मिटर जमीन ताब्यांत घेतल्या. जाल्यार सर्वोच्च न्यायालयांत खटलो चालू आशिल्ल्यान दोन कंपनींक दिल्ले 14,35,445 चौखण मिटर जमीन ताब्यांत घेवंक ना. ही म्हायती उद्देग मंत्री मॉवीन गुदिन्हो हांणी लेखी जापेंत दिल्या.
हळदोणेंचे आमदार कार्लुस फेरेरा हांणी हे संबंदांत लेखी अतारांकीत प्रस्न विचारिल्लो. लेखी जापेंतले म्हायती प्रमाण, जीआयडीसीन वेर्णेचे के. रहेजा कॉर्पोरेशन प्रा. लि. कंपनी कडल्यान 10,59,118 चौखण मिटर प्लॉट, पारडिगम लॉजिस्टीक अँड डिस्ट्रिब्युशन प्रा. लि. कंपनी कडल्यान 3,86,665 चौखण मिटर प्लॉट, ल्पॅनेटव्ह्यू मर्चंटायल कॉ. प्रा. लि. कंपनी कडल्यान 5,19,832 चौखण मिटर प्लॉट आनी सांकवाळेच्या पेनिनसुला फार्मा रिसर्च सेंटर प्ला. लि. कंपनी कडल्यान 2,03,650 चौखम मिटर प्लॉट ताब्यांत घेतला. जाल्यार सर्वोच्च न्यायालयांत खटलो चालू आशिल्ल्यान केरी फोंडेंचे मॅडिटॅब स्पेसिलायटीस प्रा. लि. कंपनी कडल्यान 12,32,000 चौखण मिटर प्लॉट आनी वेर्णेंच्या मॅक्सग्रो फिनलीस प्रा. लि. कंपनी कडल्यान 2,03,445 चौखण मिटर जमीन ताब्यांत घेवंक ना. ते भायर डीआयडीसीन 16 सप्टेंबर 2021 आनी 18 नोव्हेंबर 2021 दिसा दोन पांवड्याचेर ई निवाडो वा ई पावणी जारी करून 15 प्लॉटांचें वांटप केल्ल्याची म्हायती मंत्री गुदिन्हो हांणी लेखी जापेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
