भांगरभूंय | प्रतिनिधी
भांगरभूंय । प्रतिनिधी
म्हापशें: रक्षाबंधना खातीर भयणींक घरा हाडपी भावाची मोटार पर्वरे झाडाक आपटिल्ल्यान भिरांकूळ अपघात जालो. ह्या अपघातांत भाव, मावस भयण आनी भावोजी ह्या तिगांक सुवातेरूच मरण आयलें. दोन भयणी गंभीर जखमी जाल्यात. आयजूच राखी बांदपाक जाय, हो हट्ट म्हारग पडलो.
मरण आयिल्ल्यां मदीं शॉन फर्नांडीस (26, रा. आब्बासवाडो, काणका, बार्देस), आबिगील डिसोझा (21, रा. वाडी मेरशी, तिसवाडी) आनी वेल्ड्रोफे डिसोझा (21, रा. हणजूणें, बार्देस) हांचो आस्पाव आसा. जाल्यार फियोना डिसोझा (22, रा. वाडी मेरशी) आनी निनोष्का फर्नांडीस (21, हणजूणें) ह्यो गंभीर जखमी जाल्यात. तांचे बांबोळे गोमॅकाँत उपचार चालू आसात.
हो अपघात शेनवारा मध्यान रातीर 1.15 वरांच्या सुमाराक पर्वरेच्या पोरण्या टीव्हीएस शोरुमा लागसार आनी जेल्फिनो स्टोराचे फाटले वटेन जालो. चालक शॉन फर्नांडीस हाचें टाटा नेक्सोन ईव्ही (जीए झेड 7790) हे गतीन आशिल्ले मोटारी वयलें नियंत्रण गेल्ल्यान हो अपघात जालो. पर्वरी ते म्हापशेंचे दिशेन गतीन वचपी मोटारीन उरफाटे दिशेन वचून रस्त्याचे कुशीक नेटाचो धपको दिलो.
ह्या भिरांकूळ अपघातांत झाडाक धपको बसताच मोटारींतले अॅर बॉल फुटले आनी पांचांतल्या तिगांक सुवातेचेरूच मरण आयलें. जाल्यार मोटारीचे दावे वटेन बशिल्ल्यो दोन चलयो गंभीर जखमी जाल्यो. अपघात जाल्ले मोटारीचो खुर्दो जाला.
अपघाता वेळार रस्त्यार व्हड प्रमाणांत गाडयांची येरादारी चालू आशिल्ली. घडणुकेची म्हायती मेळटाच पर्वरी पुलिसांनी घडणुकेचे सुवातेर धांव घेतली. जखमींक 108 अॅम्ब्युलन्सींतल्यान गोमॅकाँत दाखल केले. थंय वयल्या तिगांक मरण आयिल्ल्याचें दोतोरांनी जाहीर केलें.
मरण आयिल्लो शॉन फर्नांडीस हो आब्बासवाड्यार रावतालो. वेल्ड्रोफे डिसोझा होताचो भावोजी. जाल्यार मरण आयिल्ली आबिगील डिसोझा ही ताची मावस भयण आशिल्ली.
अपघाताचो पंचनामो पुलीस निरिक्षक अनंत गांवकार हांच्या मार्गदर्शना खाला उपनिरिक्षक सर्वेश भंडारी आनी हवालदार विवेक तोरसकार हांणी केलो. फुडलो तपास पुलीस करतात.
मजगतीं, फाटल्या कांय दिसांनी गोंयांत अपघात आनी अपघातांनी मरण येवपाच्या प्रकरणांनी व्हड प्रमाणांत वाड जाल्या. सोऱ्याचे घुंवळेंत रातच्या वेळार गाडी चलयतना जावपी अपघातांची संख्याय वाडल्या. पर्वरीचो अपघात सोऱ्याचे घुंवळेंत मोटार चलयतना जाला, काय नियंत्रण गेल्ल्यान जाला हाचो सोद पुलीस घेतात.
पोरूं असोच कुचेली जाल्लो अपघात
22 मे 2022 ह्या दिसा कुचेली म्हापश्यां बेळगांवच्या तिगांक मोटार अपघातांत मरण आयिल्लें. स्विफ्ट मोटारीन झाडाक धपको दिल्ल्यान भितर बशिल्ल्या चार मदल्या तिगांक सुवातेर मरण आयिल्लें. पर्वरे जाल्ल्या अपघाता भशेन तो लेगीत आपअपघात आशिल्लो.
शेनवारा 2 सप्टेंबराक आबिगील आनी तिची भयण फियोना डिसोझा ह्यो दोगूय केप्यां आपल्या एका सोयऱ्याच्या वाडदिसाक गेल्ल्यो. थंयच्यान तांकां घरा मेरशे येवपाक उशीर जाल्लो. पूण आपल्याक आयजूच रक्षाबंधन करपाक जाय आनी हणजूण्यां सगळीं भावणां जमल्यात. ताका लागून आमी तुमकां व्हरपाक येयात, असो हट्ट करून शॉन फर्नांडीस आनी ताचे वांगडा वेल्ड्रोफे डिसोझा आनी निनोष्का फर्नांडीस हीं तिगांय आपघात जाल्ले मोटारीन मेरशे गेल्लीं. थंयच्यान दोन मावस भयणींक घेवन तीं गतीन येतना तांचे मोटारीक भिरांकूळ अपघात जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
