भांगरभूंय | प्रतिनिधी
कॉम्प्युटर वस्तू विक्रीचे हांयस दाखोवन 48.77 लाखांक फटयलें
पणजी: पर्वरे राबित्याक आशिल्ले अमेरिकन बायले कडेन इश्टागत करून आनी कॉम्प्युटराच्यो वस्तू विक्रीचो जोड वेवसाय सुरू करपाचें हांयस दाखोवन तिका 48.77 लाखांक तोपी घाल्ल्याचें प्रकरण मुखार आयलां. ह्या प्रकरणांत सायबर गुन्यांव विभागान रोहन फळदेसाय आनी साईराज फळदेसाय (कुंकळ्ळी) ह्या दोगां भावां आड गुन्यांव नोंद केला.
गोंय पुलिसांच्या सायबर गुन्यांव विभागान दिल्ले म्हायती प्रमाण ह्या प्रकरणांत पामुसा शिआँग ह्या पर्वरे रावपी अमेरिकन बायलेन सायबर विभागांत कागाळ दाखल केल्या. ते प्रमाण कुंकळ्ळेचे रोहन फळदेसाय आनी साईराज फळदेसाय ह्या दोगां भावांनी तिचे कडेन इश्टागत करून कॉम्प्युटराच्यो वस्तू विक्रीचो जोड वेवसाय सुरू करपाचें हांयस दाखयलें. ते खातीर तिका गुंतवणूक करपाक सांगलें.
तांचेर विस्वास दवरून कागाळदार बायलेन 23 नोव्हेंबर 2021 ते 18 जून 2022 मजगतीं दोगांनीय 48 लाख 77 हजार 021 रुपया क्रिप्टोपरन्सी दिली. पूण थारिल्ले प्रमाण त्या दोगांनी कांयच केलें ना. ताका लागून आपली फटवणूक जाल्ल्याचें तिच्या लक्षांत आयलें. ह्या प्रकरणांत तिणें सायबर विभागांत कागाळ दाखल केली.
पुलीस अधिक्षक अक्षत कौशल हांच्या मार्गदर्शना खाला पुलीस निरिक्षक देवेंद्र पिंगळे हांणी दुबावीत रोहन फळदेसाय आनी साईराज फळदेसाय ह्या दोगां भावां आड भारतीय दंड संहितेच्या कलम 419 आनी 420 खाला गुन्यांव दाखल करून चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
