भांगरभूंय | प्रतिनिधी
दिल्ली सरकारान काल ‘मेक इंडिया नंबर वन’ हें मिशन सुरू केलां. त्या वेळार उलयतना मुख्यमंत्री अरविंद केजरीवाल हांणी सांगलें, 130 कोटी भारतीय हो एक परिवार. आमकां एका कुटुंबा प्रमाण विचार करपाक जाय. सगल्या भुरग्यांक मुफत आनी बरें शिक्षण, सगल्यांक मुफत भलायकी उपचार, सगल्या तरणाट्यांक रोजगार, दरेके बायलेक मान, सुरक्षा आनी सगल्या शेतकामत्यांच्या पिकाक योग्य मोल…. अशे तांणी विचार मांडले. देश स्वतंत्र जावन 75 वर्सां पुराय जावनूच आमकां शिक्षण, भलायकी, रोजगार हाचेर विचार मांडचे पडटात. दर वेंचणुकेक उदरगतीच्यो येवजण्यो जाहीर करून ते खातीर कोट्यांनी रुपयांची तजवीज करची पडटा. राज्यांक अदीमदीं अब्जांनी रुपयांच्यो पॅकेजी दिवच्यो पडटात, तरीय देशाचो विकास कित्याक जायना, हाचेर सूज्ञ नागरिकांनी आतां विचार करपाक जाय. गोंयांतूय स्वतंत्रताय सुवाळ्या दिसा मुख्यमंत्री डाॅ. प्रमोद सावंत हांणी सर्वांगी उदगती खातीर 16 गांव वेंचून काडल्यात, अशें जाहीर केलें. ‘गोवन’ ह्या बॅण्डा खाला पणस, भात, नाल्ल अशा उत्पन्नांत वाड जावची म्हूण यत्न करतले. गोंय ही पर्यटनाची राजधानी जावची हे खातीरुय पावलां उखलतले अशेंय तांणी सांगलें. आमच्या देशांत घोशणा फाल्त नात. दर दिसा त्यो जातात. मात त्यो चालीक लावपांत आमचीं सरकारां, सरकारी यंत्रणां उण्यो पडटात, हें मनांत कसलोच राग धरीनासतना दरेकल्यान मानून घेवपाक जाय.
कसलीय येवजण, प्रकल्प जाहीर केलो काय तो पुराय करपाक तळमळीचे वावुरपी जाय. सगल्यांत पयलीं ताका विरोध जावपाक जायना. जालोच जाल्यार ताचे फाटलीं कारणां पयस करपाक समर्थक, विरोधकांनी एकठांय बसून ताचेर उपाय काडपाक जाय. त्या येवजण, प्रकल्पा खातीर अर्थीक निधी जाय. तो सातत्यान घोळपाक जाय. नाजाल्यार ती येवजण बंद पडटली. गोंय सरकाराच्यो येवजण्यो घेवपी गोंयकारांक हाचो अणभव आसतलोच. सगल्यांत म्हत्वाची गजाल उदरगतीच्या कामांची. रस्त्याचें एक उदाहरण पुरो. पांच वर्सां गुळगुळीत उरपी रस्तो तयार केलो जाल्यार डांबर घालपाची गरज पडची ना. मागीर कितलो दुडू उरतलो, ताची फक्त कल्पना करची! आमच्या देशांत करोडांनी रुपया कांय प्रकल्पांचेर खर्च जाल्यात, मात ते प्रकल्प सध्या कसले अवस्थेंत आसात वा प्रत्यक्षांत ते तयार तरी जाल्यात काय असो दुबाव कोणे उक्तायल्यार ताका खेपपाक मेळचो ना. भ्रश्टाचाराचीं व्हडलीं – व्हडलीं प्रकरणां फाटल्या 50 वर्सांच्या काळांत आमी भारतीयांनी पळयल्यांत. निमणे खंयचे कडेन कांय ना!
दुसरे वटेन सगल्याच सरकारां मदीं आतां मुफत दिवपाची सर्त लागल्या. एकलो वीज फुकट म्हणटा थंय आसा, दुसरो उदक फुकट म्हणटा. तिसरो हाचेर अनुदान, ताचेर सवलत दिता म्हणटा…. मात हें करपाक दुडू खंयच्यान येतलो तें कोण सांगिना. भ्रश्टाचाराचेर, उधळपट्टीचेर नियंत्रण दवरल्यार हें सहज शक्य आसा, अशें कांय जाणांचें मत. पूण ही गजाल थोडेच करपाक शकतात. आनी उरिल्ले तांकां ती करपाक दितले? हालींच्या कांय वर्सांनी तर राजकारण हो वेवसाय जाला. वेंचणुकां वेळार दोन कोटी मोडपाचे आनी उपरांत ते व्याजा सयत वसूल करपाचे. हालींच जाल्ल्या पंचायत वेंचणुकांनी 50 लाख मोडपाची ऐपत आशिल्ले लोकप्रतिनिधी उबे आशिल्ले, असो आरोप जाला. फक्त समाजसेवा, परोपकार हो उद्देश दवरून असले लोक राजकारण करतले अशी अपेक्षा दवरपाची? मुफत सुविधा दिवचे परस म्हारगाय उणी करपाचो यत्न जावंक जाय. सगल्यांक सवाय भितर उच्च शिक्षण, रोजगार, बरे उपचार, रस्ते, उदक, वीज मेळटली हे खातीर सरकारांनी उपाय करपाक जाय. समाज सुखवस्तू जातलो, तेन्ना ताका सवलती, अनुदानां दिवपाची गरज पडची ना.
गोंय सरकार गांवांची सर्वांगी उदरगत करतलें. जिणेगरजेच्यो वस्तू, रस्ते, शिक्षण, आॅनलायन वेव्हारां खातीर नेटवर्क, जीएमसीच्या दर्ज्याच्यो वैजकी सेवा, दरेका हाताक काम मेळत जाल्यार गांव आपशीच मुखार सरतले. गोंयच्या बायलोय आतां फाटीं नात. शिक्षण, रोजगारा प्रमाण त्यो राजकी मळाचेरुय मुखार आयल्यात. तांकां स्वताचे निर्णय घेवपाची मेकळीक दिवंक जाय. गोंय उदरगतीच्या मळाचेर व्हरपाचें काम गोंयच्यो बायलो एकहाती करपाक शकतात. मुख्यमंत्री प्रमोद सावंत म्हणटात, ते प्रमाण मतभेद विसरून सगल्यांनी सहकार्य दिल्यार गोंय सोंपेपणी सुजलाम, सुफलाम करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
