देशाच्या पर्जळीत फुडारा खातीर एकचारान वावुरपाची गरज

भांगरभूंय | प्रतिनिधी

दिगंबर कामत ः प्रतिभा हावसिंग सोसायटींत मनयलो स्वातंत्र्य दीस

मडगांव: भारताच्या स्वातंत्र्या खातीर कितल्याश्याच ज्ञात आनी अज्ञातांनी बलिदान केलें. कितलेशेच हुतात्मे जाले. तांचो उगडास करपाचो आयचो दीस. आमी देशाच्या पर्जळीत फुडारा खातीर एकचारान वावुरपाची गरज आसा. भारताच्या शतक महोत्सवी वर्सा आदीं भारत संवसारातलें सर्वोच्च शक्ती राष्ट्र जातलें अशें आदले मुख्यमंत्री आनी मडगांवचे आमदार दिगंबर कामत हांणी सांगलें.
आकें-मडगांवचे प्रतिभा हावसिंग सोसायटींत आझादी का अमृत महोत्सवा निमतान भारताचो स्वातंत्र्य दीस मनयलो. आमदार दिगंबर कामत हांचे हस्तुकीं बावटो हुबयलो.
आझादी का अमृत महोत्सव वर्सा निमतान प्रतिभा हावसिंग सोसायटींत बावटो हुबोवपाची कार्यावळ आयोजीत करून देशाभिमान जागोवपाचें काम केलां. हाचे मुखार तांणी अशोच कार्यावळी आयोजीत करच्यो अशें सांगून दिगंबर कामत हांणी हुतात्म्यांक वंदन केलें आनी फाटल्या 75 वर्सात देशाची सर्वागीं उदरगत जाल्या म्हणपाचें सांगलें.
प्रतिभा हावसिंग सोसायटीचे अध्यक्ष अनिल पै हांणी येवकार दिलो. आमदार दिगंबर कामत हांचे हस्तुकीं बावटो हुबयलो म्हणून तांणी खोस उक्तायली. नगरसेवक दामोदर शिरोडकार हांणी सुत्रसंचालन केलें आनी तांणीच उपकार मानले.