भांगरभूंय | प्रतिनिधी
केंद्रीय सांख्यिकी आनी अमंलबजावणी खात्याचो अहवाल
पणजी : देशांतल्या हेर राज्यांचे तुळेंत गोंयांत म्हारगाय उणी आसा. केंद्रीय सांख्यिकी आनी अंमलबजावणी खात्याच्या अहवाला प्रमाण, घाऊक म्हारगाय दर उणो आसपाचे वळेरेंत गोंय देशांत चवथे सुवातेर आसा. सप्टेंबर म्हयन्यांत गोंयांत म्हारगाय दर 3.03 टक्के आशिल्लो, जाल्यार पुराय देशा खातीर होच दर 5.02 टक्के इतलो आसा.
ह्या अहवाला प्रमाण छत्तीसगड राज्यांत देशांत सगल्यांत उणो म्हारगाय दर 1.98 टक्के आसा. ताचे उपरांत अरुणाचल प्रदेश (2.57 टक्के), सिक्किम (2.94 टक्के), गोंय (3.03 टक्के), जम्मू-काश्मीर (3.46 टक्के), अस्तंत बंगाल (3.66 टक्के), मध्य प्रदेश (3. 67 टक्के) आनी आसाम (4.39 टक्के) आसा.
सप्टेंबर म्हयन्यांत मणिपूरांत देशांत सगळ्यांत चड म्हारगाय दर 9.53 टक्क्यांनी आशिल्ली. ताचे उपरांत राजस्थान (6.53 टक्के), हरियाणा (6.49 टक्के), कर्नाटक (6 टक्के), तेलंगणा (5.97 टक्के), ओडिशा (5.87 टक्के), उत्तराखंड (5.56 टक्के), बिहार (5.53 टक्के), पंजाब (5.53 टक्के), उत्तर प्रदेश (५.४५ टक्के) ह्या राज्यांचो आस्पाव आसा.
केंद्रीय प्रदेशांमदीं दिल्लींत सगळ्यांत उणो म्हारगाय दर 2.24 टक्क्यांनी आशिल्लो. ताचे सकयल लक्षद्वीप 2.72 टक्के, अंदमान-निकोबार जुंवे (3.4 टक्के), पुडुचेरी (4.77 टक्के), दादरा आनी नगर हवेली (5.76 टक्के) ह्या राज्यांचो आस्पाव आसा.
केंद्रीय सांख्यिकी कार्यालय दर म्हयन्याक म्हारगाय दराचो अहवाल जाहीर करता. सष्टेंबराच्या अहवाला प्रमाण देशांतलो म्हारगाय दर फाटल्या तीन म्हयन्यांत सगल्यांत उणो आसा. फाटल्या कांय म्हयन्यांत भाजयो आनी कड्डणांचे दर तुळेंत देंविल्ले. देखून म्हारगाय उणी जाल्या. ऑगस्ट म्हयन्यांत देशांत म्हारगायेचें प्रमाण 6.83 टक्के आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
