भांगरभूंय | प्रतिनिधी
राज्यपाल श्रीधरन पिल्लई हांचे हस्तुकीं साहित्यिकांचो भोवमान
भांगरभूंय I प्रतिनिधी
पणजी : स्वातंत्र्य ही संकल्पना समजून घेवप गरजेचें. भारत हो विवीधतायेन संपन्न देश आसा. ताका लागून सगल्यांक सगल्या प्रकाराचे स्वातंत्र्य मेळपाक जाय. आमच्या वैविध्यपूर्ण देशांत स्वातंत्र्याची संकल्पना तिगोवपांत तशेंच देशाची एकात्मता तिगोवन दवरपांत कला आनी साहित्याचें मोलाचें योगदान आसा, अशें राज्यपाल पी. एस. श्रीधरन पिल्लई हांणी सांगलें.
‘आझादी का अमृत महोत्सव’ कार्यावळी निमतान राजभवनांत ज्ञानपीठकार साहित्यीक दामोदर मावजो हांचे सयत श्रद्धा गरड, अनुजा जोशी आनी ज्ञानेश्वर पाटील हांचो भोवमान जालो. ह्या वेळार राज्यपाल उलयताले.
राज्यपालांनी भोवमानीत केल्ल्या साहित्यिकांची तोखणाय केली. खासा करून श्रद्धा गरड हिका तिचे फुडले वाटचालीक शुभेत्सा दिवन येसाची तेंगशी गांठपाक उर्बा दिवपी भावना उक्तायली.
जिणेंत जायतीं दुख्खां येतात. परिस्थिती मुखार आमी शरण वतात. जगपाची कसलीच आस्त उरना तेन्ना बरीं पुस्तकां मनशांक उजवाड दाखयतात. वाचनान जिणेक आदार मेळटा. लेखनान म्हजें मदीं जगपाची, धडपडपाची उमेद निर्माण जाल्या. ते भायर जगप अशक्य, अशी भावना श्रद्धा गरड हांणी उक्तायल्या.
अनुजा जोशी हांणी सांगलें, म्हजो भोवमान करून मराठी साहित्य मळाचो भोवमान घडोवन हाडलां, अशें मनोगत उक्तायलें.
राज्याक सुशासक, समृद्ध विचारसरणीचे राज्यपाल लाबिल्ल्यान आयज हो भांगरायोग जुळून आयिल्ल्याचे ज्ञानेश्वर पाटील हांणी सांगलें. स्वातंत्र्य महोत्सवाच्या निमतान वैचारीक स्वातंत्र्याचो विचार मुखार येवपाक जाय, अशें मत तांणी उक्तायलें. राजभवनांत आयोजीत भोवमान सुवाळ्यांत ते उलयताले.
भोवमान सुवाळ्याक हाजीर राविल्ले खातीर राज्यपाल श्रीधरन पिल्लई हांणी सगल्यांचे उपकार मानले. तशेंच फुडले दोन दीस राजभवनांत जावपी कार्यावळींक हाजीर रावचे अशें आवाहन तांणी केलें. विवीध घटकां खातीर वेगळ्यावेगळ्या कार्यावळींचे आयोजन केलां.
स्वातंत्र्य महोत्सवांत लेखकांक आस्पावन घेतिल्ल्याची खोसः मावजो
साहित्याचो भोवमान देशाच्या 75व्या स्वातंत्र्यदिसा निमतान जावपी उत्सवांत लेखकांकूय आस्पावन घेतात, हाची खोस जाता. हो भाेवमान म्हजो वैयक्तीक नासून तो साहित्याचो भोवमान आसा. आझादी का अमृत महोत्सवा निमतान भोवमानाचे अमृत थेंब घेवन हांव धन्य जाला, अशें साहित्यीक दामोदर मावजो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
