भांगरभूंय | प्रतिनिधी
-जुगार विरोधाचो संबंद ना, इब्रापुरांतल्या म्हाजनांचें स्पश्टीकरण
पणजीः इब्रामपूरांत श्री सांतेरी देवी जात्रेचे फाटभुंयेर एका वेगळ्याच विशया वयल्यान सध्या वाद सुरू जाला. म्हाजनांच्या म्हणण्या प्रमाण, देवस्थानाच्या कार्यांत दरवर्सा आडमेळीं हाडटात म्हूण, 14 जाणांचीं नांवां नोटीस बोर्डाचेर प्रसिद्ध केल्यात. जात्रे निमतान चलपी जुगाराक विरोध केलो म्हूण ही नांवां प्रसिद्ध करूंक नात, अशें इब्रामपूरच्या श्री सांतेरी देवस्थानाचे म्हाजन सत्यम गांवस आनी हेर म्हाजनांनी स्पश्ट केला.
देवस्थान समितीन ज्या 14 जाणांची नांवां नोटीस बोर्डाचेर लायल्यात, ते 14 जाण दरवर्सा सांतेरी देवस्थानची जात्रा, वर्धापनदीस कार्यावळींनी विवीध कारणांनी आडमेळीं हाडपाचो यत्न करतात. पुलीस स्टेशनांत कागाळ दाखल करून गांवची बदनामी करपाचो यत्न करतात. ताका लागुनूच अंदूं तांची नांवां नोटीस बोर्डाचेर लावपाचो निर्णय घेतला, अशें ह्या म्हाजनांनी अामच्या प्रतिनिधी कडेन उलयतना सांगलें.
सांतेरी देवीच्या जात्रेंत जुगाराक थारो दिवचो न्हय, ताचो परिणाम भाविकांचेर जाता. जुगाराक लागून भावीक बेगीन घरा वतात. ते खातीर देवस्थान समितीन गांभीर्यान विचार करून अंदूं जात्रेंत जुगार चलोवपाक दिवचो न्हय, अशें निवेदन राजाराम विष्णू गांवस, गंगाधर गांवस, गोपाळ मठकार, विकास गांवस, रामचंद्र गांवस, संतोष धाऊस्कार, सुधीर धाऊस्कर, अर्जुन धाऊस्कर, कृष्णा गांवस, महादेव गांवस, कृष्णा धाऊस्कार, नागेश गांवस आनी मच्छिंद्रनाथ गांवस हांणी पुलीस म्हासंचालका सयत मोपा पुलीस स्टेशन, उत्तर गोंय पुलीस अधिक्षक, उपअधिक्षक तशेंच गुन्यांव फांट्याकूय सादर केलां.
ह्याच व्यक्तींचीं नांवां समितीन नोटीस बोर्डाचेर लायिल्ली. हाचे वयल्यान वाद सुरू जाले उपरांत जुगाराक विरोध केलो म्हूण न्हय, जाल्यार देवस्थानाच्या कार्यांत आडमेळी हाडिल्ल्यान तांचीं नांवां प्रसिद्ध केल्यात, अशी भुमिका देवस्थान समितीन मांडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
