भांगरभूंय | प्रतिनिधी
आदल्या तेंपार आमची आजी आनी आई णववारी काठपदरी कापड आनी खणाची आंगभर चोळी घाली. केंसांचो वाटकुळो आंबाडो आनी ताचेर पोरसांत फुलिल्लीं आंबोलीं, बटन शेंवतीं, गोठ्ठां हांची फाती माळटाली. नाजाल्यार कसलेंय तरी फूल आंबाड्यांत खोंयताली. तिका तें माळपाची संवयूच जाल्ली. घरांतलें सगलें काम, भात कांडप, रगडो, घुरसुण्यार मिरसांग वांटप, आदोळेचेर नाल्लाचें वळें कांतप, भाजी शिनप हीं सगलीं कामां तीं चुकनासतना करताली. णववारी कापडाची तिका कांयच अडचण जायनासली.
कालांतरान कापडाचो जागो स वारी साडयेन घेतलो. आंगभर साडी आनी ताचेर तरेकवार ब्लावज घालपाची फॅशनूच आयली. आपले ऐपती प्रमाण साडयो न्हेसप हो तांचो छंद. साडी हो भारतीय पोशाख. साडयेन जण एकली बायल उठून, खुलून दिसता. लांबच्या लांब पदर हे तिच्या आंगाचें सुरक्षा कवच. तांकांय काम करतना कसली अडचण आयली ना.
आतां बाजारां, माॅलांनी तरेकवार डिझायनाचे, फॅशनीचे कपडे विकपाक येतात. शाॅर्टस, मिनिस्कर्ट, मिडी, स्लिव्हलेस, टाॅप लो रायज जीन्स, स्कीन टायट जिन्स आनी शाॅर्ट टीशर्ट. पारदर्शक कपडेय आसतात. हे तरेचे अर्दें आंग उक्तें दिसपी, पोट, मांडयो दिसपी कपडे घालपाची वायट संवय तरणाटे पिळगेक जाल्या. उठसूठ असले कपडे घालून तरणाटे, तरणाट्यो गांवभर भोंवत आसतात. हिप्पी सारके अंगप्रदर्शन करप तांकां आवडूंक लागलां. तशें केल्यार आपूण माॅर्डन अशें तांकां दिसता.
हे असलेच कपडे घालून चले, चलयो देवळांत वतात. पर्यटकूय कुडीचें प्रदर्शन करतात. आमचे हिंदू लोकूय तांचें अनुकरण करतात. बिभत्स कपडे घालतात. तांकां लज नासता. पूण सज्जन मनशांचेर दोळे बंद करपाची पाळी येता. देवळाच्या पावित्र्याक बाधा येता. हें बरें वर्तन न्हय. देवळांत वतना संस्कृतायेक सोब सारकेच कपडे घालून वचपाक जाय.
चड करून चलयो, बायलांनी आंगभर साडी आनी तरेभाशेचे पोलके, मॅचिंग कांकणां, क्लिप्स, सेंडल, पर्सी, केसांत मॅचिंग फुलां माळ्ळीं म्हूण कांयच हरकत ना. पूण अर्दनग्न, अर्दकुटे कपडे घालून देवळांत वचूं नये. नाजाल्यार देवळांत प्रवेश मेळप कठीण जातलें, हें मतींत दवरचें.
–
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
