भांगरभूंय | प्रतिनिधी
2.20 कोटींची तोपीः जोडप्या आड गुन्यांव
भांगरभूंय | प्रतिनिधी
मडगांव: नागवाडो बेताळभाटीच्या डिसोझा जोडप्यान बेलोय, नुवेंची सुमार 19 हजार चौखण मिटर जमनीचीं बनावट कागदपत्रां करून 2.20 कोटींचो सौदा केलो. हे विशीं फटींगपणां जाल्ल्याचें कळटाच जैन जीत हांणी कागाळ केली. ते प्रमाण आग्नेल आनी मॅकलीन डिसोझा हांचे आड मायणा कुडतरी पुलिशेंत गुन्यांव नोंद केला.
हे विशीं मेळिल्ले म्हायती प्रमाण, हीं फटींगपणां 2017त जीत जैन हांचे वांगडा जाल्लीं. आग्नेल आनी मॅकलीन डिसोझा हांणी बनावट कागदपत्रां करून बेलॉय नुवेंची 19,250 चौखण मीटर जमीन कागाळदार जैन हाका 17 जुलय 2017 ह्या दिसा विकिल्ली. ताका लागून ह्या जोडप्यान आगावू रक्कम म्हणून 2 कोटी 20 लाख रुपया घेतिल्ले. उपरांत फुडली प्रक्रिया करपाक डिसोझा हांणी ताकतीक केली. जैन हांणी चवकशी केली तेन्ना विक्री केल्ले जमिनीचो मूळ धनी पुर्तुगेज आशिल्ल्यान तांणी ही जमीन दुसर्याच विकिल्ल्याचें नदरेक आयलें.
फटींगपणां प्रकरणांत जैन हांणी कागाळ दाखल केली. ते प्रमाण पुलिसांनी दुबावीत आग्नेल डिसोझा आनी मॅकलीन डिसोझा हांचे आड फटल्ल्याचो गुन्यांव नोंद केलो. हें प्रकरण जमिनी विशीं आशिल्ल्यान फुडलो तपास एसआयटी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
