दुबळ्या झिम्बाब्वे मुखार ऑस्ट्रेलियेची दिमी

भांगरभूंय | प्रतिनिधी

झिम्बाब्वेन तीन मॅचींचे वन डे माळेंतले निमाणे मॅचींत ऑस्ट्रेलिये आड 3 विकेटींनी जैत जोडलें. झिम्बाब्वेन ऑस्ट्रेलियेक ताचेच भुंयेर हारोवपाची ही पयली खेप. पयलीं बॅटींग करतना झिम्बाब्वेन येजमान पंगडाचो डाव फक्त 141 धांवड्यांचेर गुंठलायलो. ते उपरांत 39 ओव्हरींनी 7 विकेटी वगडावन मोख मेळयली.

झिम्बाब्वेच्या मुखेल्यान टॉस जिखून पयलीं बॉलींग करपाचो निर्णय घेतलो. मुखेल्याचो हो निर्णय ताच्या बॉलरांनी योग्य थारायलो. ताच्या बॉलरांनी सुरवाती पसून विकेटी घेतल्यो.

ऑस्ट्रेलियेन पयली विकेट 9 धांवड्यांचेर वगडायली. ते उपरांत थारावीक अंतरान विकेटी पडत गेल्यो. 72 धांवड्यो जाल्यो ते मेरेन ऑस्ट्रेलियेचे पांच बॅट्समन तंबूंत परत गेल्ले. डॅव्हीड वॉर्नरान एक बाजू सांबाळून धरिल्ली. पूण, ताका दुसरे वटेच्यान योग्य साथ मेळूंक ना. फक्त दोनूच बॅट्समनांक दोट्टी आंकडो हुपप शक्य जालें.

वॉर्नरान 96 बॉलांनी 94 धांवड्यो केल्यो. जाल्यार ग्लॅन मॅक्सवॅलान 22 बॉलांनी 19 धांवड्यांचें योगदान दिलें. उरिल्ल्या आठ बॅट्समनांनी 0 ते 5 मदीं धांवड्यो करून तंबूंत परतले. अशे करेन ऑस्ट्रेलियेचो संपुर्ण पंगड 31 ओव्हरींनी 141 धांवड्यो करून बाद जालो. झिम्बाब्वेच्या रायनान 3 ओव्हरींनी 10 धांवड्यो दिवन 5 विकेटी घेतल्यो.

142 धांवड्यांचो फाटलाव करपी झिम्बाब्वेची सुरवात बरी जाली. पयले विकेटी खातीर 38 धांवड्यांची भागिदारी केली. पूण, पयली विकेट पडल्या उपरांत एका फाटल्यान एक विकेट पडत गेल्यो. एका वेळार झिम्बाब्वेन 77चेर 5 विकेटी वगडायिल्ल्यो. हांगाच्या मुखेली रेगिसान सगलीं सुत्रां आपल्या हातांत घेतलीं आनी फुडल्या दोन विकेटीं खातीर ल्हानल्हान भागिदाऱ्यो करून झिम्बाब्वेक इतिहासीक जैत मेळोवन दिलें. झिम्बाब्वेन 39वे ओव्हरींत मोख मेळयली.