दुपदरी रेलमार्ग नाका, कोळसोय नाकाच

जाहीर सभेक हाजीर आशिल्ले लोक. (अक्षंदा राणे)

भांगरभूंय | प्रतिनिधी

गोंयचो एकवोट संघटणेचे जाहीर सभेंत लोकांची मागणी

भांगरभूंय । प्रतिनिधी

वास्कोः दुपदरी रेलमार्ग आनी कोळसो येरादारी आड वेळसांव लोकां मदीं जनजागृताय करचे खातीर गोंयचो एकवोट संघटणेन आयतारा दनपारां जाहीर सभा आयोजीत केल्ली. तातूंत दुपदरी रेलमार्ग नाका कोळसो नाका असो आवाज घुमलो.

दुपदरी रेलमार्गाक वेळसांव वाठारांतल्यान चड विरोध जायत आसा. थंय रेल्वे विकास निगम लिमिटेड आनी थळाव्या लोकांमदीं नेमान वाद जातात. रेल्वे विकास निगम थंय बांदकाम करतना पावसाळ्यांत उदकाचो विलो लावपी परंपरीक वाट, उदकाचे स्त्रोत बी पुरयतात, असो दावो थळावे लोक करतात. थंयच्या बांदकामा विशीं थळाव्या लोकांक योग्य म्हायती मेळची हे खातीर लोकां मदीं जागृताय करपाचें काम सुरू जालां. आयतारा दनपारां 3 वरांचेर थळाव्या लोकां खातीर खाशेली जाहीर सभा आपयिल्ली. ते खातीर लावडस्पिकर लावपाची परवानगी मागिल्ली, पूण ती न्हयकारली. ते खातीर संबंदितांनी नाराजी उक्तायली.

हे जाहीर सभेक आमदार विजय सरदेसाय, आदली आमदार एलिना साल्ढाणा, कॅप्टन विरयितो फर्नांडीस, ओलंसियो सिमोईश, सावियो डिसोझा, समाज वावुरपी जयेश शेटगांवकार, ओर्विल्लो दोरादो आनी हेर मानेस्त हाजीर राविल्ले. तांणी आपल्या उलोवपांत केंद्र आनी राज्य सरकाराचेर टिका केली.

लोकांचो आवाज आयकात. लोकांचे भलायके कडेन खेळूं नाकात, पर्यावरणाचें घट्टण करूं नाका, अशें एलिना साल्ढाणा हांणी उलो मारलो. आमी दुपदरी रेलमार्ग जावपाक दिवचे नात, अशें तांणी स्पश्ट केलें.

सरकार लोक विरोधी आशिल्ल्याचो दावो जयेश शेटगांवकार हांणी केलो.

सागरमाला प्रकल्पाक महाराष्ट्र, केरळ आनी हेर राज्यांतल्यान विरोध जाता. आमकांय सागरमाला प्रकल्प नाका. रेल्वे विकास निगम थळावे जमनीचेर भराव घालून रेलमार्ग करपाचो जो यत्न करता तो आमी येसस्वी जावपाक दिवचे नात. आमकां दुपदरी रेलमार्गाची आनी कोळशाची गरज ना. ज्या राज्यांक कोळशाची गरज आसा थंय ती सुविधा निर्माण करची, अशें ओलंसियो सिमोईश हांणी सांगलें.

कोळसो येरादारी बंद जाय मेरेन आमचो लडो चालूच उरतलो. गोंय सरकार गोंयचो एकवोट संघटणेचो आवाज चेंपून दवरपाक शकना. लोकां मदीं दुपदरी रेलमार्ग आनी कोळश्या आड जागृताय जाता, हेच खातीर आयचे सभेक व्हड संख्येन लोक आयल्यात. फुडले सभेक हाचे परस अदीक लोक येतले, अशी शिटकावणी साबार उलोवप्यांनी दिली. आमदार संकल्प आमोणकार, आमदार दिगंबर कामत, आमदार आलेक्स सिक्वेरा हांणी दुपदरी रेलमार्गाक विरोध केल्लो. आतां ते सत्ताधारी पक्षांत आसात. तांणी आपली भुमिका स्पश्ट करची, अशें हे सभेंत तांकां आव्हान दिलें.

पावसूय लोकांक हालोवपाक शकलो ना…

विवीध वक्त्यांनी दुपदरी रेलमार्ग आनी कोळसोय येरादारी संबंदांत गोंय सरकारान घेतिल्ले भुमिकेचेर टिका केली. दुपदरी रेलमार्गाचें काम बंद करचें, अशी एकमतान हाजीर आशिल्ल्या सगळ्या लोकांनी मागणी केली. जाहीर सभेक लावडस्पिकर लावपा खातीर मागिल्ली परवानगी न्हयकारली, मात लावडस्पिकर नासतनाय वक्त्यांनी आपले विचार हाजीर आशिल्ल्यां मेरेन पावोवपाचो यत्न केलो. ह्या वेळार पावसानूय हाजेरी लायली, पूण सभेक आयिल्ले लोक मातूय हालनासतना थंय बसून रावले.