भांगरभूंय | प्रतिनिधी
कालें सांगेचें आस्थापन सोडटा खदूळ उदक; लोक घेराव घालपाचे तयारेंत
फोंडें: खांडेपारा दुदसगर न्हंयेंत फाटल्या शेनवारा रातीं सावन खदूळ उदक व्हांवून येता. कोडली-दाबाळ वाठारांतल्या लोकांनी पोरूं वर्सा कालें-सांगें हांगासरल्या एका आस्थापनांच्या अधिकाऱ्यांक घेराव घालून न्हंयेंत खदूळ उदक सोडपाचें बंद करचें अशी मागणी केल्ली. त्या वेळार अधिकाऱ्यांनी फुडारांत खदूळ उदक न्हंयेंत सोडचे नात अशें आस्वासन लोकांक दिल्लें. पूण चवथीच्या काळांत परतून खदूळ उदक सोडिल्ल्यान कोडली गांवांतले लोक परतून आस्थापनाचेर मोर्चा व्हरपाचे तयारेंत आसात.
फाटल्या वर्सा दुदसागर न्हंयेंत खदूळ उदक सोडपाचो विशय गाजिल्लो. किर्लपाल दाबाळे पंचायतीचे ग्रामसभेंत लेगीत खदूळ उदकाचो विशय तापिल्लो. तिडकल्ल्या लोकांनी कालें-सांगें हांगासरल्या एका आस्थापनांच्या अधिकाऱ्यांक घेराव घाल्लो. अधिकाऱ्यांनी त्या वेळार घेराव घालपी लोकांक पावसाच्या दिसांनी सगले तरेची जतनाय घेवन खदूळ उदक न्हयेंत परतून सोडचे नात अशें आस्वासन दिल्लें. पूण फाटल्या शेनवारा रातीं सावन न्हंयेंत परतून खदूळ उदक सोडिल्ल्याचें दिसून येता. म्हत्वाची गजाल म्हणल्यार कोडली ते खांडेपार मेरेनच्या खूबशा गांवांतल्या लोकांक दुदसागर न्हंयेंत पंप बसोवन उदकाची पुरवण करतात. ताका लागून पावसाच्या दिसांनी लोकांक खदूळ उदकाचो वापर सेगीत करचो पडटा.
चवथीच्या काळांत लोकांक खदूळ उदकाचो त्रास जावचो न्हय हे खातीर बांदकाम खात्यान दखल घेवपाची मागणी थळावे लोक करतात. नाजाल्यार चवथीच्या काळांत आस्थापनाचेर मोर्चा व्हरपाची शिटकावणी कोडली वाठारांतल्या लोकांनी शिटकावणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
