भांगरभूंय | प्रतिनिधी
मुरगांव: बंगळुरू रेल्वे स्टेशना वेल्यान यशवंतपूर रेल्वेन वास्को रेल्वे स्टेशनार येत आसतना दुदसागर रेल्वे स्टेशनार एका रेल्वेंतल्या प्रवाशाक अस्वस्थ दिसूंक लागलें. अस्वस्थ दिसूंक लागिल्ल्यान ताका ओंकारी येता अशें दिसलें म्हूण तो रेल्वेच्या दारा कुशीक वचून ओंकपाचो यत्न करीत आसतना, ताचो तोल गेल्ल्यान तो धांवते रेल्वे खाला रुळार पडिल्ल्यान ताका जाग्यारूच मरण आयलें.
वास्को रेल्वे पुलीस निरिक्षक अमरनाथ पाशी हांणी कुडीचो पंचनामो करून कूड फुडले तपासणी खातीर मडगांवच्या हॉस्पिसियो हॉस्पिटलांत धाडून दिल्या.
मुरगांव म्हालाचे पुलीस उपअधिक्षक शेख सलीम हांणी दिल्ले म्हायती प्रमाण काल (आयतारा) बंगळुरू रेल्वे स्टेशना वेल्यान निळकंठ चव्हाण (आंकवार) यशवंतपूर लोकल रेल्वेंतल्यान वास्को रेल्वे स्टेशनार येतालो. रेल्वे लोकल आशिल्ल्यान प्रवाशांनी भरिल्ली. फांतोडेर 4 वरांचेर दुदसागर रेल्वे स्टेशनार ती पावली तेन्ना निळकंठ हाका अस्वस्थ दिसूंक लागलें. ताका ओंकारी येता अशें दिसतकूच तो रेल्वेच्या दारा कुशीक येवन ओंकपाचो यत्न करूंक लागलो तेन्ना ताचो तोल गेल्ल्यान तो रेल्वे रुळार पडलो आनी जाग्यारूच ताका मरण आयलें.
वास्को रेल्वे पुलिसांनी घडणूक थळार वचून निळकंठ हाचे कुडीचो पंचनामो केलो. गोंयांत वास्को येता आसतना निळकंठा सयत ताचो इश्ट आशिल्लो अशी म्हायती उपअधिक्षक सलीम शेख हांणी दिली.
वास्को रेल्वे पुलीस निरिक्षक अमरनाथ पाशी हांणी निळकंठाच्या इश्टाची जबानी नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
