भांगरभूंय | प्रतिनिधी
पोरूं दोन व्हड दुखापतींक तोंड दिवपी फास्ट बॉलर दीपक चाहर आतां पुर्ण तंदुरुस्त जाला आनी 31 मार्चा सावन सुरू जावपी इंडियन प्रिमियर लिगेंत (आयपीएल) खेळपाक सज्ज आसा.
30 वर्सां पिरायेच्या दीपकाक स्ट्रेस फ्रॅक्चर आनी क्वाड इंजरी हातूंल्यान बरो जावपाक खूब कठीण जाला. भारतीय पंगडा वतीन तो निमाणे खेपे डिसेंबरांत मीरपूरांत बांगलादेशा आड दुसरे वन डे मॅचींत खेळिल्लो. ते मॅचींत तीन ओव्हरी घाल्या उपरांत ताणें मैदान सोंडिल्लें.
दुखापतीक लागून दीपक पोरूं फकत 15 मॅची खेळिल्लो. दुखापतीक लागून ताका पोरूं जाल्ली संवसारीक टी-20 सर्त लेगीत चुकिल्ली. राष्ट्रीय क्रिकेट अकादमींत रिहॅबांत रावल्या उपरांत दीपक आतां आयपीएलाची तयारी करता. तो आयपीएलांत चेन्नय सुपरकिंग्सा वतीन खेळटलो.
आपूण जर बॅट्समन आशिल्लो, जाल्यार खूब पयलीं पुनरागमन करतलो आशिल्लो. पूण, फास्ट बॉलराक स्ट्रेस फ्रॅक्चर जाता तेन्ना पुनरागमन करप कठीण जाता अशें दीपकान म्हणलें.
सेगीत जावपी दुखापतींक लागून भारतीय फास्ट बॉलरांचे वळेरेंत खूब सकयल घसरलो. पूण, वर्साचे अखेरेक भारतांत जावपी संवसारीक वन डे क्रिकेट सर्ती खातीर पंगडाचें प्रतिनिधित्व करपाक तो इत्सूक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
