भांगरभूंय | प्रतिनिधी
वरभर येरादारी आडावलीः कंत्राटदाराची मनमानी
भांगरभूंय । प्रतिनिधी
पेडणें: मोरजे भुंयगत वीज केबल घालपाचें कंत्राट घेतिल्लो कंत्राटदार आपल्याक जाय त्या दिसा, जाय त्या वेळार, येरादारी पुलिशेक कळयनासतना, दिशा दाखोवपी तकटे लायनासतना रस्तो खणटा. हाका लागून मोरजे दिसपट्टी येरादारेची कोंयडी जाता. ताका लागून सामान्य मनीस बेजारला.
मोरजी विद्या प्रसारक हायस्कूल वाठारांतल्या क्वेरांत सुमार वरभर येरादारी आडावली. थंय सांजेच्या स वरांचेर अदींमदीं कंत्राटदार खणटा. हे काम करतना गाडयांक वचपाक सुवात मेळटली काय ना ताचो तो मातूय विचार करिना. एक गाडी आडावली जाल्यार फाटल्यान येवपी सगळ्योच गाडयो आडावतात. जे मेरेन पयली गाडी काडिना ते मेरेन सगळी येरादारी थंयच आडावन उरता. हो कंत्राटदार जंय खणटा ती जमीन आपलीच कशी वागता. येरादारी खातें आनी पुलिसांचेंय हे कडेन पुराय आडनदर जाल्या.
11 डिसेंबराक प्रधानमंत्री गोंयांत येवपाचे आसा. तांचे वाटेर कसल्योच आडमेळी येवच्यो न्हय हे खातीर सगळी यंत्रणा तातूंत येरादारी पुलीस, येरादारी खात्याचे अधिकारी पूर्व तयारेक लागल्यात. हाका लागून दर्यादेग वाठारांत पर्यटन मोसम सुरू जाल्ल्यान हजारांनी देशी- विदेशी पर्यटक आपापलीं वाहनां घेवन ह्या वाठारांत येतात. दुसरे वटेन खणिल्ल्या रस्त्याक लागून आदींच जाल्ले कोंयडेंत तांचीय भर पडटा. फाटल्या दोन म्हयन्यां सावन फोडून दवरिल्ले रस्ते जे मेरेन जाग्यार घालिनात ते मेरेन कोंयडी सुटपाचीं शक्यताय दिसना.
दोन दिसां आदीं मांद्रें जुनसवाड्यार व्हड प्रमाणांत येरादारीची कोंयडी डाल्ली. ताचेर नियंत्रण मेळोवपा खातीर आमदार जीत आरोलकार स्वता रस्त्याचेर देंवून गाडयांक वाट करून दिताले.
मोरजे जंक्शनाचेर जेसीबीचो वापर करून दीसरात रस्तो खणून लोकांक त्रास करपी कंत्राटदाराचेर खरें म्हणल्यार कारवाय जावपाक जाय, अशें थळाव्या लोकांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
