भांगरभूंय | प्रतिनिधी
निकतोच उत्तर भारतांत उटंगाराचो पावस पडटालो, पावसाळ्यांत उत्तर भारताची भोंवडी केन्नाच करूंक नाशिल्ली म्हूण मन वाराणसी वटेन वळ्ळें, हरशीं हांव वाराणसी गेल्लों, तरीय पावसाळ्यांतली काशी पळोवंक वचुया म्हूण मन घट्ट केलें. काशी, बनारस, वाराणसी अशा साबार नांवांनी फामाद आशिल्लें आर्विल्लें वाराणसी शार उत्तर प्रदेश राज्यांत गंगा न्हंयेचे देगेर वसलां. वाराणसीचें चित्र दोळ्यां मुखार हाडल्यार अशीर रस्ते, घाट, गंगा आरती, पान बनारस वाला आनी बनारसी साडी हांचो विचार आयले शिवाय उरना. धर्मीक म्हत्व लाभिल्लें हें शार हिंदू, बौद्ध आनी जैन धर्माचें तीर्थस्थान, पवित्रस्थान आसा.
वाराणसी ही म्हापुरुशांची भूंय म्हूण लेगीत वळखतात. संत वल्लभाचार्य, रविदास, कबीर, मुंशी प्रेमचंद, पंडित रविशंकर, गौतम बुद्ध, मदन मोहन मालवीय, लाल बहादूर शास्त्री, बिस्मिल्लाह खान आनी साबार फामाद व्यक्तीत्व वाराणसी कडेन संबंदीत आसात. वाराणासी शाराची निर्मणी शेंकड्यांनी वर्सां आदीं जाल्ल्याचो उल्लेख मेळटा. पोरण्या वाराणसी शारांत पांयवाटांनी चलतना शार कितलें पोरणें आसुंये हाचो अंदाज लावूं येता. साबार घरांनी देवळां, शिवलिंग दिसून येतात. घराची वास्तूशैली लेगीत प्राचीन देवळा भशेन आसा. काशी विश्वनाथ देवळाक लागून फामाद आशिल्ल्या ह्या गांवकारांची वळख ‘हर हर महादेव’ ह्या घोशवाक्यां वरवीं पटून येता. उलोवपाक सुरू करतना आनी उलोवन जातकच हर हर महादेव हाचो उल्लेख जाल्ल्याचो दिसता. पोरण्या वाराणसी शारांतले अशीर रस्ते सोदप गुगल मॅपाक लेगीत जमचेना म्हळ्यार चुकीचें जावचें ना. साबार वेळा भेट दिवन लेगीत लक्षांत उरचें नात अशो हांगाच्यो पांयवाटो. एकेच तरेचीं घरां, रंग, भोंवतणच्या वातावरणाक लागून अदीक घुस्पागोंदळ जाता.
वरुणा आनी असी ह्या दोन न्हंयांच्या मदीं वशिल्लो गांव वाराणासी आनी ह्याच दोन न्हंयांक लागून वाराणासी नांव घडलां. काशी आनी हिंदू धर्माचो लागींचो संबंद आसा, साबार भजनांनी, संस्कृत श्लोकांनी काशीचो उल्लेख मेळटा. पुर्विल्ल्या काळार वाराणासींत एकूण 365 घाट आशिल्ले अशें मानतात, अशिक्षीत लोक दर दिसा एका घाटार न्हाताले आनी सगळ्या घाटांनी न्हावन जातकच एक वर्स पुराय जाल्ल्याचें तांकां जाणवताले अशें थळावे लोक म्हणटात. आतां वाराणासींत सुमार 100 परस अदीक घाट आसात, तातूंत कांय खाजगी घाटांचोय आसपाव आसा. मराठा, होळकर, भोसले, शिंदे (सिंदिया), पेशवा साम्राज्यांनी कांय घाट बांदून काडिल्ल्याचोय इतिहास आमकां मेळटा. दशाश्वमेध घाट गंगा आरती खातीर भोव फामाद आसा, शेंकड्यांनी देशी-विदेशी पर्यटक गंगा आरतीचें मन भुलोवपी दृश्य पळोवंक हांगा पावतात. हरिश्चन्द्र घाट आनी मणिकर्णिका घाट हे दोन मोक्ष मेळोवपी घाट अशी मान्यताय आसा. ह्या दोन घाटांचेर मनशाचे कुडीचेर निमणी क्रिया करतात, पयले खेपें कोणेंय हांगासल्लें दृश्य पळयल्यार आंगार कांटो फुल्ले शिवाय रावचो ना. ह्या घाटांचेर एकाच वेळार कितल्योशोच कुडी निमणे क्रिये खातीर रांगेंत दवरिल्ल्यो आसतात. कूड आदीं गंगेंत बुडयतात आनी उपरांत ताचेर निमणी क्रिया करतात. आमचे खातीर हें पळोवप जरी विचीत्र आसलें, तरीय थळाव्यां खातीर ती गजाल सदचीच जाल्या.
काशी विश्वनाथ देवूळ पोरण्या वाराणसी शारांत गच्च लोकवस्ती मदीं स्थीत आशिल्लें, पूण हालींच काशी विश्वनाथ कॉरिडोर बांदून देवळा भोंवतणचो वाठार मेकळो केला, नव्यान बांदिल्ल्या कॉरिडोरांत आधुनीक वास्तुशिल्पाचो वापर करून पौराणीक इतिहासाचें दर्शन घडटा. काशी विश्वनाथ देवूळ हें बारा ज्योतिर्लिंगां मदलें एक म्हत्वाचें ज्योतिर्लिंग, सद्या आशिल्लें देवूळ अहिल्याबाई होळकर हांणी सुमार 18 व्या शेंकड्यांत बांदून काडिल्लें. ज्योतिर्लिंगाचें दर्शन घेवंक पुराय देशभरांतल्यान भक्त हांगा पावतात. देवळाच्या परिसरांतूच ज्ञानवापी मशीद स्थीत आसा, विवादांत सांपडिल्ले हे मशिदींत प्रवेश करूंक मेळना, पूण पयसुल्ल्यान हिंदू-मुस्लीम वास्तुशैलीचें मिश्रण पळोवंक मेळटा.
हांव पितृपक्षाच्या वेळार पाविल्ल्यान वाराणासी शारभर दक्षीण भारतीयांची संख्या अदीक आसली, श्राद्ध विधी करूंक दक्षीण भारतीय व्हडा प्रमाणांत काशी आनी गया ह्या सुवातींनी पावतात. काशी हें भारतांतले सगळ्यांत पुर्विल्लें कॉस्मोपॉलिटन शार म्हळ्यार चुकीचें जावचें ना, कारण शेंकड्यांनी वर्सा आदीं सावन भारतांतल्या सगळ्या प्रांताचें लोक हांगा मेळटात. भटपण, देवकार्याक लागून लोक थंयच स्थायीक जालो, आनी कितलेशेच पर्यटक लेगीत काशावासी जावन रावले. प्रत्येक प्रांतांतलें जेवण-खाण काशींत सहज उपलब्द आसता. प्रत्येक हॉटेलांत दक्षीण भारतीय जेवण मेळटा, पूण तें अस्सल दक्षीण भारतीय जेवण काय न्हय तें जेवुनूच कळपाचें.
स्कन्द पुराण, रामायण, महाभारत तशेंच ऋगवेदांत काशी शाराचो उल्लेख मेळटा. काशींत येवन मेल्यार पुनर्जल्माच्या चक्रांतल्यान मुक्ती मेळटा असो विश्वास आसा देखून काशींत मरपाचो सौभाग्य मेळचो म्हूण हांगा कितलीशींच मुक्ती भवनां आसात, जंय शेंकड्यांनी लोक आपल्या जाणटेपणांत येवन रावतात आनी निमणो श्वास घेतात.
पंडित मदन मोहन मालवीय हांणी स्थापीत केल्ले काशी हिन्दू विद्यापीठ साबार वर्ग किलोमीटर क्षेत्रफळांत पातळ्ळां. ह्या विद्यापिठाच्या परिसरांत आय.आय.टी आनी वैजकी महाविद्यालय लेगीत आसपावीत आसा.
वाराणसी शाराचे शिमेरूच सारनाथ गांव वसलां, भगवान बुद्धान धर्म चक्र परिवर्तन नांवाचो आपलो पयलो उपदेश हांगाच दिल्लो. कंबोडिया, भूतान, नेपाल, लाओस, थायलँड, म्यानमार, श्रीलंका सारकेल्या देशांतल्यान बौद्ध भक्त ह्या पवित्र बौद्ध तीर्थस्थानाक भेट दितात. महाबोधी देवूळ, स्तूप, कुटी विहार, अशोक स्तंभ हांगाची सोबीतकाय वाडयतात.
रेशम साडी (बनारसी साडी), पुराय जगभर फामाद आशिल्लो हो साडयेचो प्रकार, पारंपारीक पद्दतीन फकत मुसलमान समाजाचे लोक साडी विणपाचें काम करतात, आनी फकत आपल्या चले भुरग्यांकूच विणकाम शिकयतात असो समज आसा. तरेकवार प्रकाराच्यो साडयो हांगा पळोवंक आनी खरेदी करूंक मेळटात, पूण वांटपण करपी मनशाकूच योग्य मोलान साडी मेळटली हातूंत दुबाव ना. हालींच बनारसाक शंघाय कोऑपरेशन ऑर्गनायजेशनान पर्यटन आनी सांस्कृतीक राजधानीचो दर्जो दिला. प्रधानमंत्री नरेंद्र मोदीचो मतदारसंघ आशिल्ल्यान वाराणसीचें वजन वाडिल्लेंच पूण सांस्कृतीक राजधानीचो दर्जो मेळिल्ल्यान पर्यटनाच्या मळार काशी आनीक दिव्य आनी भव्य जातली हातूंत दुबाव ना. संस्कृत- हिंदी- भोजपुरी भाशीक थळावे लोक आतिथ्याचें एक बेस बरें उदारण. चलात तर, बनारस वचून थळावी ठंडाई पिवुया आनी बनारसी गोड पान खावन तोंड गोड करुया.
शरत रायकार
8669105824
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
