भांगरभूंय | प्रतिनिधी
21 इमारतींचेर 8 कोटींच्या खर्चाचो दिव्यांगांक लाव ना
पणजी : केंद्र सरकाराच्या डिसॅबिलीटी ॲक्सेसिबल मोहिमे खाला राज्यात 21 इमारतींचेर 8 कोटींचो खर्च जाला, ताचो दिव्यांग लोकांक कसलोच लाव जायना. ह्या खर्चाची चवकशी करपाची मागणी ड्रॅगाचे अध्यक्ष आवेलिनो डिसा हांणी केल्या. हे इमारतींत दिव्यांग लोकां खातीर नितळ घर ना, तशेंच दिव्यांगांक पार्किंग करप कुस्तार जाता. खर्च केला खंय, हाची चवकशी जावपाची मागणी डिसा हांणी पत्रकार परिशदेंत केली.
21 इमारतींचेर 8 कोटी म्हळ्यार 1 इमारतीचेर सरासरी 40 लाख खर्च जाता. ह्या खर्चाची चवकशी करपाची मागणी तांणी केली. सरकारी इमारती पावंड्या पावंड्यान डीजेबल फ्रेंडली करपाची घोशणा मुख्यमंत्री डॉ. प्रमोद सावंत हांणी केल्ली. ज्यो इमारती डीजेबल फ्रेंडली जाल्याचो दावो सरकार करता, त्या इमारती विशीं ड्रॅग संघटना समाधानी ना.
दिव्यांगां खातीर फाटले वर्सा पर्पल महोत्सव जालो. ह्या महोत्सवाचेर सरकारान कोट्यांनी रुपया खर्च केले. महोत्सवांत वांटेकार जाल्ल्या दिव्यांग भुरग्यांक अजून प्रमाणपत्र वा भेटवस्तू पसून मेळूंक ना. खर्च केलो खंय? असो प्रस्न डिसा हांणी केला. पर्पल महोत्सव खर्चाच्या तपशिलाची संघटनेन मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
