दिवचल म्हालांत रंगतली पंचायत वेंचणूक

भांगरभूंय | प्रतिनिधी

17 पंचायती, 125 प्रभाग, 397 उमेदवार; पक्ष पांवड्याचेरूय लायला नेट

भांगरभूंय । प्रतिनिधी

दिवचलः दिवचल म्हालांतल्या मयें, दिवचल, सांखळी ह्या तीन मतदारसंघांतल्या वट्ट 17 पंचायत प्रभागांतल्या 125 सुवातां खातीर 397 उमेदवार रिंगणांत देंवल्यात. राजकी पांवड्याचेर खूबशा पंचायत प्रभागांनी पड्ड्या फाटल्या हालचालींक नेट आयला.

दिवचल म्हालांतल्या मुळगांव, पिळगांव, साळ, शिरगांव, सुर्ला, वेळगें ह्या पंचायतींत महिला सरपंच राखीव दवरलां. सांखळी मतदारसंघांत पाळी, वेळगें, आमोणे, न्हावेली, सुर्ला, कुडणें ह्या पंचायतींत तीन उमेदवार बिनविरोध वेंचून हाडपाक मुख्यमंत्री डॉ. प्रमोद सावंत हांकां येस आयलां.

कांय कडेन भाजपाचे कार्यकर्ते आनी फुडारी एकामेकां मुखार उबे राविल्यान पक्ष पांवड्याचेर अडचण जाल्या. ताका लागून तेंको कोणाक दिवचो, होवूय प्रस्न मतदारां मदीं उपस्थीत जाला. काँग्रेस पक्षाच्या तेंक्याचेर कांय उमेदवार रिंगणांत देंवल्यात. कांय जाण स्वताचे तांकीचेर वेंचणूक लडयतात. मुख्यमंत्री डॉ. सावंत तशेंच भाजपा फुडारी निमाण्या खिणाक कसली भुमिका घेतले ताचेर मतदारांचें लक्ष आसा.

दिवचल मतदारसंघांतल्यान दोन उमेदवार बिनविरोध वेंचून आयल्यात जाल्यार मयें मतदारसंघांत चार जाण बिनविरोध वेंचून आयल्यात.

आमदार प्रेमेंद्र शेट हांणी मयां लक्ष केंद्रीत केलां. तरी लेगीत थंय भाजपाचे खूबशे कार्यकर्ते आमने सामने आसात.

दिवचल मतदारसंघांत आमदार डॉ. चंद्रकांत शेट्ये हांचे मर्जेंतले खूबशे उमेदवार रिंगणांत आसात. भाजपा वतीन लेगीत कांय उमेदवार उबे रावल्यात. हाका लागून वेंचणूक रंगपाची शक्यताय आसा.

हे खेपे महिला उमेदवारांची संख्या खूब आसा. तांणी घराघरांनी वचून प्रचार करपाचेर भर दिला. प्रभागांतल्या मतदारांची संख्या 200 ते 600 मेरेन मर्यादीत आशिल्ल्यान आनी एकाच प्रभागांतल्यान खूबशे उमेदवार रिंगणांत आशिल्ल्यान दर मत मोलादीक थारतलें. मतदारांक वेगवेगळीं हांयसां दाखोवपाचेय प्रकार चल्ल्यात. मुळाव्यो सुविधा तशेंच वेगवेगळ्या येवजण्यो चालीक लावपाचींय आस्वासनां दिवप चालू आसा.

उदरगतीची दिशा शेणिल्लो प्रचार

दर प्रभागांत उमेदवारांची संख्या चड आशिल्ल्यान मतांची विभागणी जावन धपको दिवपी निकाल लागूं येता. उदरगतीच्या मुद्द्या विशीं गटारां, चक्कर टायल्स, रस्ते, उदक हाचेरूच उदरगतीची दिशा मर्यादीत आशिल्ल्याचें प्रचारा वयल्यान दिसता. गांवाच्या सामुदायीक उदरगतीचे आनी दूरदिश्टीचे प्रकल्प हातांत घेवपा संबंदांत उमेदवार चड उमेदी नात. गांवाचे उगरगतीची दिशा निश्चीत करतना गांवांतल्या विद्यार्थ्यां खातीर शिक्षणीक उपक्रम चालीक लावप, वाचन, जीम, पर्यावरण जागृती, सामुहीक वनमहोत्सव हे सारकिल्ले उपक्रम हातांत घेवपा संबंदांत कोणूच लक्ष दिना. ताका लागून उदरगतीची दिशा वगडायिल्लो प्रचार पंचायत वेंचणुकेंत दिसता.