भांगरभूंय | प्रतिनिधी
घांटार पावसाक नेटः अंजुणें धरणाचीं चारूय दारां उक्तीं
भांगरभूंय । प्रतिनिधी
दिवचलः दिवचल म्हाला सयत घांटार पावसाचो नेट वाडला. ताका लागून तिळारी सयत दिवचल तशेंच व्हाळवाट न्हंयेच्या पात्रांत वाड जाल्या. ते खातीर सांखळे पंपिंग सुरू केल्लें.
मजगतीं, मेळिल्ले म्हायती प्रमाण अंजुणें धरणाचे पातळेंत 93.26 मिटर मेरेन वाड जाल्या. धरणाचीं चारूय दां उक्त्यो करून 28.50 कुमेक्स उदकाचो विसर्ग सुरू आसा, अशी म्हायती धरण अभियंते रामा गवस हांणी दिली.
तिळारी न्हंयेन धोक्याची पातळी वलांडल्या. भेडशी रस्तो उदका पोंदा गेला. धरणाचीं दारां उक्तीं करून विसर्ग सुरू आसा. शापोरा न्हंयेच्या पात्रांत वाड जायत आसा. तेचवरी आमठाणे धरणाची पातळीय वाडल्या.
म्हालांत झाडां हुमटून पडूंक नासलीं तरीय साबार वाठारांतले रस्ते उदका पोंदा गेले. उदक शिंपणावळ खात्याचे अधिकारी स्थितीचेर नदर दवरून आसात.
तिळारी धरण वाठारांत आतां मेरेन 3294.80 मिमी पावसाची नोंद जाल्या. आयतारा 138 मिमी पावसाची नोंद जाली. दिवचल आपत्कालीन विभागान सगळे तरेची खबरदारी घेवची असो आदेश आमदार डॉ. चंद्रकांत शेट्ये हांणी दिल्यात. सध्या कसलोच धोको ना, अशी म्हायती अधिकाऱ्यांनी दिल्या. पावसाचो नेट चालू आशिल्यान मुख्यमंत्री डॉ. प्रमोद सावंत हांणी लेगीत सगळे तरेची खबरदारी घेवपाचे आदेश संबंदीत खात्यांक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
