भांगरभूंय | प्रतिनिधी
भांगरभूंय । प्रतिनिधी
दिवचलः दिवचलच्या केरळ लोकांच्या कल्पका सांस्कृतीक असोसिएशना वतीन कोरोना म्हामारी उपरांत दोन वर्सांनी अंदूचो ओणम उत्सव बोर्डें- दिवचलच्या महामाय देवळाच्या सभाघरांत 17 आनी 18 सप्टेंबराक व्हडा दबाज्यान मनयतले. असोसिएशनाचो अध्यक्ष जीव्ही जयप्रकाश हांणी ही म्हायती दिली. ह्या वेळार प्रसाद नायर, नितीश बाब, दिनेश चिराशेरी, व्ही प्रसाद हाजीर आशिल्ले.
17 सप्टेंबराक दनपारां 2.30 वरांचेर पारंपरीक सर्ती, इनाम भेटवण कार्यावळ जातली. आयतार 18 सप्टेंबराक मुखेल कार्यावळ जातली. सकाळीं 8 तें 10 मजगती पोक्कलम ही फुलांची रांगोळ सर्त जातली. 10 वरांचेर दिवपी पेटयतले उपरांत सांस्कृतीक कार्यावळ जातली. ह्या वेळार मुखेल सोयरे म्हणून गोरवां सांबाळ खात्याचे मंत्री निळकंठ हळर्णकार, दिवचलचो आमदार डॉ चंद्रकांत शेट्ये हाजीर रावतले.
दनपारां 12 वरांचेर ओणसंध्या ही खासा केरळी पद्दतीच्या जेणणाचो स्वाद घेवपाची संद हाजीर आशिल्ल्यांक मेळटली. त्या उपरांत कमलत्तम ही लोकगितां आनी पारंपरीक प्रकारांचे सादरीकरण जातलें. गोंयांत राबित्याक आशिल्ल्या केरळी लोकांवतीन मनयतात तो ओणम आतां गोंयचोय जाला अशें जयप्रकाश हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
