भांगरभूंय | प्रतिनिधी
नवी दिल्ली, खबरां संस्था ः दिल्ली वेंचणुकेच्या निकालाचें चित्र आतां पुरायपणान स्पश्ट जालां. दिल्लींत २७ वर्सां उपरांत भाजपा सत्तेंत आयल्या. सध्या ७० मदल्या ४५ जाग्यांचेर मुखार आसात. कांय निकाल जाहीर जाल्यात. आदले मुख्यमंत्री साहिबसिंह वर्मा हांचे पूत परवेश वर्मा मुख्यमंत्री जावपाची शक्यताय आसा. तांणी अरविंद केजरीवाल हांकां हारयल्यात. भाजपाच्यो दोन आदल्यो बायल खासदार हे विधानसभा वेंचणुकेंत जिखल्यात. तांचे मदल्या एकल्याक वा वर्मा हांकां मुख्यमंत्री पद मेळूं येता, अशें भाजपा सुत्रांनी सांगलें.
ह्या निकालांत आपचे अरविंद केजरीवाल नवी दिल्लीतल्यान आनी सिसोदिया जंगपुरा मतदारसंघांतल्यान वेंचणूक हारले. आम आदमी पक्षाचे आदले मुख्यमंत्री अरविंद केजरीवाल हाकां भाजपाच्या परवेश वर्मा हांणी ३१८२ मतांनी हारयले. कालकाजी मतदारसंघांतल्यान मुख्यमंत्री अतिशी हांणी वेंचणूक जिखल्या. तिणें भाजपाचे आदले खासदार रमेश बिधुरी हांकां साडेतीन हजार मतांनी हारयले. वेंचणुकेंत आपाचे सत्येंद्र जैन हांकाय हार मानची पडली.
दिल्लींतल्या भाजपाच्या मुखेल कार्यालयांत उत्सव आनी उमेदीचे वातावरण आसा. प्रधानमंत्री नरेंद्र मोदी सांजवेळा ७ वरांचेर पक्षाच्या मुखेल कार्यालयांत पावतले आनी कार्यकर्त्यांक संबोदीत करतले. मजगतीं, केजरीवाल हांकां हारयल्ले भाजपा उमेदवार परवेश वर्मा हांणी अमित शहा हांची भेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
