दामोदर उच्च माध्यमीक वस्ताद

भांगरभूंय | प्रतिनिधी

गुडी पाड्डेंच्या दामोदर उच्च माध्यमीक विद्यालयान दोन गोलांनी फाटीं पडून लेगीत अखेरेक केपें तालुको 17 वर्सां पिराये सकयली सुब्रतो मुखर्जी फुटबॉल सर्त जिखली.

फायनलींत ताणें कुडचडेंच्या गार्डियन अॅंजल उच्च माध्यमीक विद्यालयाक 5-2 गोल फरकांनी हारयलो. खेळां आनी युवा वेव्हार संचालनालया वतीन आयोजीत केल्ले सर्तीची फायनल पंटेमळ कुडचडेंच्या फिगरेदो मैदानाचेर जाली.

मॅरीक पिशोटान मॅचीच्या पयल्या आठ मिनटां भितर दोन गोल करून गार्डियनाक 2-0 अशी आघाडी मेळोवन दिली. पूण, ते उपरांत दामोदर उच्च माध्यमीक विद्यालयाच्या पंगडान फाटोफाट पांच गोल करून मॅच घुंवडायली.

लिक्सन रिबेलोन हॅट्रीक केली. ताचे खेरीत सोहन पार्गे आनी डॅनीस ऑलिव्हेरा हाणें दरेकी एक गोल केलो.

तालुको पांवड्याचेर वस्तादपण मेळयिल्ल्यान दामोदर उच्च माध्यमीक पंगड आतां जिल्हो पांवड्या खातीर पात्र थारलो.