भांगरभूंय | प्रतिनिधी
गुडीच्या दामोदर उच्च माध्यमीक पंगडान पुर्ण मॅचीचेर आपलो शेक दवरतना पिलारच्या फादर आग्नेल उच्च माध्यमीक पंगडाक हारोवन 17 वर्सां पिराये सकयले चल्यांचे नेहरू करंड हॉकी सर्तीचें वस्तादपण जोडलें. मॅच म्हापशेंच्या पेडें खेळां संकूल मैदानाचेर जाली.
ह्या जैताक लागून दामोदर उच्च माध्यमीक विद्यालय आतां नवी दिल्लींत जावपी चल्यांच्या 17 वर्सां पिराये सकयले अखील भारतीय नेहरू करंड हॉकी सर्तींत राज्याचें प्रतिनिधित्व करतलें.
नवी दिल्ली वचपाक दामोदर उच्च माध्यमिकाचो पंगड 31 ऑगस्टाक भायर सरतलो.
मजगतीं, फायनलींत ताणें फादर आग्नेल उच्च माध्यमिकाक 4-0 अशा गोल फरकांनी हारयलो. मध्यांतरा मेरेन दामोदर 2-0 असो मुखार आशिल्लो.
दामोदर उच्च माध्यमिकाच्या जैतांत जाफर मोमीन शाह पर्जळ्ळो. ताणें हॅट्रीक केली. ताचे खेरीत एक गोल कृष गांवकारान एक गोल केलो.
ते पयलीं दामोदर उच्च माध्यमिकान चांदरच्या सेंट जोसेफ हायस्कुलाक हारयलो, दुसरे मॅचींत म्हापशेंच्या जनता हायस्कुलाक आनी सेमी फायनलींत दामोदर ईएचएसाक 8-1 अशा फरकान हारयलो.
पंगडाक शारिरीक शिक्षण शिक्षक जयकृष्ण नायक देसाय आनी प्रणव प्रभुदेसाय हांणी प्रशिक्षण दिल्लें.
तिसरी सुवात गुडीच्या दामोदर इंग्लीश हायस्कुलाक फावो जाली. ताणें टायब्रेकरांत मोर्लेच्या सरकारी हायस्कुलाच्या पंगडाक हारयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
