भांगरभूंय | प्रतिनिधी
फायनलींत म्हापशेंच्या सेंट झेवियर्स उच्च माध्यमिकाच्या पंगडाक पॅनल्टीचेर 3-0 अशा गोल फरकांनी हारोवन गुडी पाड्डेच्या दामोदर उच्च माध्यमीक स्कुलाच्या पंगडान खेळां आनी युवा वेव्हार खात्यान आयोजीत केल्ले 19 वर्सां पिराये सकयले आंतर उच्च माध्यमीक पांवड्या वयले चल्यांचे हॉकी सर्तीचें राज्य वस्तादपण जोडलें.
फायनल पेडें खेळां संकुलाच्या अॅस्ट्रो टर्फाचेर जाली. दक्षीण गोंयचें वस्तादपण जोडपी नावेलीच्या रोझरी उच्च माध्यमिकाच्या पंगडाक हारोवन दामोदर उच्च माध्यमिकान राज्य पांवड्या वयले लडतींत खेळपाची पात्रताय मेळयिल्ली. फायनल मॅचीच्या पुर्ण वेळाच्या खेळांत दोनूय पंगड 1-1 अशे बरोबरींत उरिल्ले.
दामोदर उच्च माध्यमिकाच्या ओंकार गांवकारान गोल करून पंगडाक आघाडी मेळोवन दिल्ली. पूण, ते उपरांत सेंट झेवियर्स उच्च माध्यमिकाच्या स्कुलान गोल करून मॅचींत 1-1 अशी बरोबरी सादली. अखेरेक बरोबरीची कोंयडी फोडपाक टायब्रेकराचो आदार घेवचो पडलो.
दामोदर उच्च माध्यमीक स्कुला खातीर भारत गांवकार, साहिल गांवकार आनी सुहेल गांवकार हांणी गोल केले. दामोदराचो गोलकीपर अभिषेक कामतीन मॅचींत जबरदस्त प्रदर्शन केलें. ताणें पॅनल्टी स्ट्रोकांत सेंट झेवियर्साच्या खेळगड्यांचे सगले स्ट्रोक आडायले.
दामोदर उच्च माध्यमिकाच्या पंगडाक खेळां शिक्षक जयकृष्ण नायक देसाय आनी प्रणव प्रभुदेसाय हांचें प्रशिक्षण लाबिल्लें जाल्यार पंगड वेवस्थापक दिलखूश गांवकाराचें मार्गदर्शन लाबिल्लें.
दामोदर उच्च माध्यमिकाच्या पंगडांत भारत गांवकार, अभिषेक कामत, सुहेल गांवकार, नागराज गनीगर, पवन लमाणी, विकास लमाणी, साहिल गावडे, राज वर्मा, ऋत्विक गांवकार, ओंकार गांवकार, उपमन्यू रेडकार, क्रिश गांवकार, परेश पाटील, जय गांवकार, मोमीन शाहजाफर, गोविंद गडकरी, उत्कर्ष देवत कारापूरकार आनी रोहित गांवकार हाचो आस्पाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
