भांगरभूंय | प्रतिनिधी
दोनूय कडेन अजून इंचांचो शेंकडो हुपूंक ना
भांगरभूंय । प्रतिनिधी
पणजी : हेर वाठारा परस दाबोळी आनी मुरगांवां पावसाचें प्रमाण उणें आसा. मुरगांवां आतां मेरेन 2374.1 मिमि (93.46 इंच) जाल्यार दाबोळे 2420.3 मिमि (95.28 इंच) पावस जाला. हेर सगळी कडेन इंचांचो शंकडो पुराय जावन सरासरी पावस 109 इंच जाला.
केप्यां सगळ्यांत चड 3109.4 मिमि (122.41 इंच) पावसाची नोंद जाल्या. मडगांव, सांखळी, सांगें, म्हापशें, वाळपय वाठारांत इंचांचा शेंकडो पावसान हुपला. एल निनो चक्रीवादळ तशेंच वातावरणांतल्या बदलांक लागून ऑगस्टांत पावसाचें प्रमाण सरासरी परस 60 टक्के उणें जालें. जुलयांत घोग्यांनी पावस पडले उपरांत पावसाचें प्रमाण सरासरी परस चड आशिल्ले. आतां पावस सरसरी परस फक्त 1 टक्के चड आसा. ‘सरप्लस’ पावस आतां ‘डेफिसिट’ जावपाचे वाटेर आसा. ऑगस्टांत सरासरी 28.67 इंच (728.3 मिमि.) पावस पडटा. अंदूं ऑगस्टांत फक्त 11.38 इंच (289.1 मिमि.) पावसाची नोंद जाल्या.
ऑगस्टांत पुराय देशांतूच पावसाचें प्रमाण उणें आसा. गोंयचे तुळेंत हेर राज्यांनी पावस बरोच उणो आसा. एल निनो चक्रीवादळाच्या प्रभावाक लागून पावसाचें प्रमाण उणें जालां. एल निनोचो प्रभाव उणो जाले उपरांत मॉन्सून सक्रीय जातलो, अशें वैज्ञानिकांचें मत आसा.
आतां मेरेन जूनांत 25.78 इंच, जुलयांत 83.54 इंच जाल्यार ऑगस्टांत 11.38 इंच पावस नोंद जाला. अंदूं 11 जूनाक राज्यांत मॉन्सून पाविल्लो. पयलीं धा दीस पावसाक नेट नाशिल्लो. जून सोंपपाक पावसान नेट धरलो. जूनांतलो पावसाचो उणाव मात्सो उणो जालो. जुलयांत सेगीत पावस पडलो. पावस ना असो एकूय दीस गेलो ना. वादळी पावसाक लागून राज्यांत बरीच पडझड जाल्ली. हातूंत लाखांनी रुपयांचें लुकसाण जालें. 28 जुलय उपरांत पावसाचें प्रमाण उणें जावपाक लागलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
