भांगरभूंय | प्रतिनिधी
पणजीः सैन्य अधिकारी आशिल्ल्याचें भासोवन 90 गिरायक दिवपाचें नाटक करून एका दांताच्या दोतोराची 90 हजार रुपयांची फटवणूक केल्ल्या प्रकरणांत पणजी पुलिसांनी अज्ञात मनशा आड गुन्यांव दाखल केला.
पणजी पुलिसांनी दिल्ले म्हायती प्रमाण ह्या प्रकरणांत डॉ. फैजा शेख हांणी कागाळ दाखल केल्या. ते प्रमाण तिचे पणजे दांताचें क्लिनीक आसा. ताका गिरायक दिवपाचें हायस दाखोवन एका मनशान सैन्य अधिकारी आशिल्ल्याचें दाखोवन व्हॉटस्अपाचेर तिचे कडेन संपर्क केलो. ह्या वेळार संबंदीत मनशान 8814068473 ह्या मोबायल नंबरा वयल्यान व्हिडीयो कॉल करून तिका 90 गिरायक दिवपाचें हायस दाखयलें. तशेंच तिचे कडल्यान 27 जुलयाक सकाळीं 10.30 ते दनपारां 1 वरा मजगतीं गुगल पे वरवीं 90 हजार रुपया घेवन तिची फटवणूक केली.
हाची दखल घेवन पुलीस निरिक्षक निखील पालयेंकार हाच्या मार्गदर्शना खाला महिला पुलीस उपनिरिक्षक सपना गांवस हांणी अज्ञात मनशा आड फटवणूक केल्ल्या प्रकरणांत गुन्यांव दाखल करून तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
