भांगरभूंय | प्रतिनिधी
-दक्षीण गोंय जिल्होधिकाऱ्यांचो उपजिल्होधिकारी, मामलेदारांक आदेश
– शेनवारा सयत सप्तकभरांत जातल्यो सुनावण्यो
पणजी : शेनवारा सयत सप्तकभर मुंडकार खटल्यांची सुनावणी घेवन सोमारा अहवाल सादर करपाचो आदेश दक्षीण गोंय जिल्होधिकाऱ्यांनी उपजिल्होधिकारी तशेंच मामलेदारांक दिला. सप्तकभरांत कितल्यो सुनावण्यो जाल्यो त्या खटल्यांचो केस नंबर तशेंच खटल्याची स्थिती हाचो अहवाल सादर करचो पडटलो. सप्तकांत जितल्यो सुनावण्यो जाल्यात तांचो अहवाल सोमार मेरेन उपजिल्होधिकाऱ्यांक सादर करप बंधनकारक आसा.
दक्षीण गोंय जिल्होधिकाऱ्यांनी मुंडकार खटल्यांच्या सुनावणी विशीं आदेश जारी केला. असोच आदेश उत्तर गोंय जिल्होधिकाऱ्यां कडल्यान कांय दिसांत जारी जावपाचो आसा. फुडल्या तीन म्हयन्यांत मुंडकार खटले निकालांत काडपाचे आदेश मुख्यमंत्री डॉ. प्रमोद सावंत हांणी येणावळ खात्याक दिल्यात. ह्या आदेशाची कार्यवाही करपाची प्रक्रिया खात्यान सुरू केल्या.
दक्षीण गोंयांत 1,082 जाल्यार उत्तर गोंयांत 920 मुंडकारांचे खटले प्रलंबीत आशिल्ल्याची म्हायती अधिकाऱ्यां कडल्यान मेळ्ळी. हे खटले निकालांत काडपा विशीं मुख्यमंत्री डॉ. प्रमोद सावंत हांणी सोमारा अधिकाऱ्यांची बसका घेतली. हे बसकेंत मुंडकार खटल्यांचो नियाळ घेवपा सयत मुख्यमंत्र्यांनी तीन म्हयन्यांत खटले निकालांत काडपाची डेडलायन दिली.
खटले बेगिनांत बेगीन निकालांत काडपा खातीर कायदो दुरुस्तीचो प्रस्ताव आसा. तशेंच उपजिल्होधिकारी तशेंच मामलेदारांनी शेनवारा सयत सेगीत सुनावणी घेवची. हेर कामां कुशीक दवरून मुंडकार खटल्यांच्या सुनावणेक प्राधान्य दिवचे, अशें मुख्यमंत्र्यांनी सांगलां. मुंडकारांचे खटले बरीच वर्सां प्रलंबीत आसात. हे खटले निकालांत काडपाची जापसालदारकी खासा मामलेदारां कडेन दिल्या, पूण हेर कामांक लागून सुनावणी नेटान जायना.
सध्या 9 मामलेदारांचो उणाव आसा. मामलेदारांची भरती करपाचे आदेश कार्मीक खात्याक दिल्या. मामलेदारांची भरती जाले उपरांत मुंडकारांच्या खटल्यांची सुनावणी आनीक नेटान जातली.
मुंडकार खटल्यांच्या सुनावणे खातीर उत्तर गोंय जिल्होधिकाऱ्यांनी खासा मामलेदार नियुक्त करपाचो आदेश 30 जानेवारी 2023 दिसा जारी केल्लो. कूळ-मुंडकार खटल्यांची सुनावणी घेवन त्यो निकालांत काडपा खातीर खासा मामलेदार नियुक्तीचो आदेश जारी जाला. तरी त्याच मामलेदारां कडेन हेर जापसालदारक्यो आशिल्ल्यान खटल्यांच्यो सुनावण्यो नेटान जायनात. हाका लागून मुंडकार खटले प्रलंबीत आसात.
पेडणें- जोड मामलेदार 1, दिवचले- जोड मामलेदार 2, बार्देश- जोड मामलेदार 2, सत्तरी- जोड मामलेदार 1, तिसवाडी- 4 जोड मामलेदारांची कूळ-मुंडकार खटल्या खातीर खासा मामलेदार म्हूण नेमणूक जाल्या.
दक्षीण गोंया खातीर साश्ट – जोड मामलेदार 2 आनी 5, फोंडें – 2 जोड मामलेदार, मुरगांव – 2 जोड मामलेदारांची खासा मामलेदार म्हूण नेमणूक जाल्या.
मांद्रेंचे आमदार जीत आरोलकार हांणी फाटल्या म्हयन्यांत मुख्यमंत्री डॉ. प्रमोद सावंत हांची भेट घेवन पेडणें म्हालांतले मुंडकार खटले बेगीन निकालांत काडपाची मागणी केली. हाचे उपरांत प्रलंबीत मुंडकार खटल्यांचो विशय चर्चेंत आयलो.
अहवाल विहीत नमुन्यांत जाय
सप्तकभरांत ज्यो सुनावण्यो जातात, ताचो अहवाल जिल्होधिकाऱ्यांक सोमारा सादर करचो पडलो. अहवाल सादर करपाचो विहीत नमुनो आराखडो लेगीत उपजिल्होधिकारी/मामलेदारांक दिला. खटल्याचो नंबर, खटल्यांतले याचिकादार आनी प्रतिवादी, सुनावणेची तारीख, खटल्याची स्थिती आनी शेरो हाची म्हायती मामलेदार/उपजिल्होधिकारी/जोड मामलेदार हांका दिवची पडटली.
सप्तकभरांत संबंदींत उपजिल्होधिकारी वा मामलेदारान खंयच्या आनी कितल्या मुंडकार खटल्यांची सुनावणी घेतली, ताची म्हायती सरकाराक उपलब्ध जातली. तशेंच खंयचे खटले निकालाक लागी पावल्या, ताचो अदमास येतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
