दर्यादेगो गजबजल्यो, देशी-विदेशी पर्यटकांचो हुंवार

भांगरभूंय | प्रतिनिधी

जून, जुलयांत सुमार 11 लाख पर्यटकांची गोंयाक भेट

पणजी : अंदूंच्या माॅन्सून हंगामांतल्या जून आनी जुलय ह्या सुरवातीच्या दोन म्हयन्यांत देशी-विदेशी पर्यटकांनी गोंयांत गर्दी केल्या. देशी पर्यटकांनी अंदूंच्या ह्या दोन म्हयन्यातं विक्रमी संख्येन हजेरी लायली. जाल्यार कोवीड नियंत्रणांत आयिल्ल्यान ह्या दोन म्हयन्यांत आयिल्ल्या विदेशी पर्यटकांनीय वाड जाल्या.
पर्यटन खात्या कडल्यान मेळिल्ले आंकडेवारी प्रमाण, अंदूंच्या जूनांत 6,08,477 आनी जुलयांत 4,62,538 देशी पर्यटकांनी गोंयाक भेट दिल्या. 2020 आनी 2021त कोविडाक लागून देशी पर्यटकांनी गोंया कडेन फाट केल्ली. पूण ताचे पयलीं 2019त जूनांत 5,25,483 आनी जुलयांत 4,43,888 पर्यटकांनी गोंयाक भेट दिल्ली. 2019 मेरेनच्या ह्या दोन म्हयन्यांतली ही आंकडेवारी आशिल्ली. पूण कोवीड म्हामारी सोंपले उपरांत देशी पर्यटकांनी गोंयाक पसंती दिल्ल्याचे मार्च ते मे मेरेनच्या आंकडेवारी वयल्यान दिसून येता.
अंदूं जानेवारी ते जुलय मेरेन वट्ट 39,05,153 देशी पर्यटक गोंयांत दाखल जाले. ते उपरांतूय पर्यटक गोंयांत दाखल जायत आसात. विमानतळ, रेल्वे प्रशासना कडल्यान अधिकृत म्हायती मेळूंक नाशिल्ल्यान पर्यटन खात्यान ऑगस्ट अानी सप्टेंबरांत दाखल जाल्ल्या पर्यटकांची नोंद करूंक ना, अशी म्हायती पर्यटन खात्याच्या अधिकाऱ्यांनी दिली.
मजगतीं, देशी-विदेशी पर्यटकां खातीर गोंय हो पर्यटनाचो स्वर्ग आसा. ताका लागून दरवर्सा देशांतल्या विवीध राज्यांतले पर्यटक गोंयांत येवन पर्यटनाचो आस्वाद घेतात. 2020 आनी 2021 ह्या दोन वर्सांत कोवीड प्रसार कायम उरिल्ल्यान पर्यटकांनी आपल्या राज्यांतूच रावप पसंत केल्ले. पूण कोवीड नियंत्रणांत अायले उपरांत मात परतून गोंयची वाट धरली. राज्यांतल्या वाडट्या पर्यटकांचे फाटभुंयेर राज्य सरकारान पर्यटकां खातीर गरजेच्यो साधनसुविधा वाडोवपाचेर भर दिला.

विदेशी पर्यटकांचे संख्येंत वाड
देशी पर्यटकां वांगडाच विदेशी पर्यटकांचे संख्येत मॉन्सून काळांत वाड जाल्या. अंदूंच्या जूनांत 11,146 आनी जुलयांत 13,201 विदेशी पर्यटक गोंयांत दाखल जाले. जुलयांत अायिल्ल्या विदेशी पर्यटकांची संख्या फाटल्या णव वर्सांतली सगल्यांत चड आशिल्ल्याचे आंकडेवारींतल्यान स्पश्ट जालां. 2019च्या जूनांत 18,529 जाल्यार जुलयांत 12,580 विदेशी पर्यटकांनी गोंयाक भेट दिल्ली.