भांगरभूंय | प्रतिनिधी
मुख्यमंत्रीः आयुर्वेद पर्यटनाक मेळटली उर्बा
संवसारीक आयुर्वेद काँग्रेसीचें उक्तावण
पणजी : आयुर्वेद उपचार तशेंच सल्लो दिवपा खातीर दरेकी सरकारी हॉस्पिटलांनी आयुष केंद्र सुरू जातलें. धारगळच्या आयुर्वेद संस्थेच्या उपगिऱ्या केंद्राक लागून राज्यांत आयुर्वेद पर्यटनाक उर्बा मेळटली, अशें मुख्यमंत्री डॉ. प्रमोद सावंत हांणी सांगलें. आयुर्वेद काँग्रेसच्या उक्तावण कार्यावळींत ते उलयताले.
पणजेंत 9व्या संवसारीक आयुर्वेद काँग्रेसीचें मुख्यमंत्री डॉ. प्रमोद सावंत हांचें हस्तुकीं उक्तावण जालें. ह्या वेळार केंद्रीय पर्यटन राज्य मंत्री श्रीपाद नायक, आयुष मंत्रालयाचे सचीव राजेश कोटेचा आनी हेर मानेस्त हाजीर आशिल्ले.
आयुर्वेदीक काँग्रेस आयोजीत करपाची संद गोंयाक मेळ्ळी म्हूण मुख्यमंत्र्यान केंद्राचे उपकार मानले. आयुष उपचारा खातीर आयुष व्हिसा सुरू करपाचो निर्णय इतिहासीक आसा. धारगळे सुरू जावपी आयुर्वेद संस्थेंत उपगिरे केंद्र आसतलें. ह्या केंद्राक लागून राज्यांत आयुर्वेद पर्यटन सुरू जातलें. आयुर्वेद संस्थेंत 50 टक्के जागे गोंयच्या विद्यार्थ्यां खातीर राखीव आसतले. गोंयच्या विद्यार्थ्यांक दर्जेदार आयुर्वेद शिक्षण घेवपाची संद मेळटली.
केंद्र सरकारान 2014त स्वतंत्र आयुष मंत्रालय स्थापन केले. आयुश मंत्रालय स्थापन केल्ल्यान आयुर्वेदाचो पुराय संवसारांत विस्तार जावप शक्य जाले, अशें केंद्रीय मंत्री श्रीपाद नायक हांणी सांगलें. देशांतूच न्हय जाल्यार पुराय संवसारांत आयुर्वेदाची उदरगत जायत आसा. भारतानूच संवसाराक आयुर्वेदाची वळख करून दिली. ‘वसुधैव कुटुंबकम’ ही भारताची संस्कृताय. एकवटीत राष्ट्रसंघान 2015त संवसारीक योग दीस मनोवपाचो निर्णय घेतलो. आतां पुराय संवसारांत योग दीस मनयतात. योगाचो लाव संवसारांतल्या सगल्या लोकांक जावपाक लागला. आयुर्वेद उपचार पद्दत आतां हेर देशांनी लेगीत सुरू जाल्या, अशें श्रीपाद नायक हांणी सांगलें.
कोवीड काळांत 89.9 टक्के लोकांनी घेतली आयुष वखदां
कोवीड 19च्या वेवस्थापनांत आयुष उपचाराचो वांटो व्हड आसा. कोविडा वेळार 89.9 टक्के देशाच्या नागरिकांनी कोवीड नियंत्रणा खातीर आयुष उपचारांचो वापर केलो, अशें आयुष मंत्रालयाचे सचीव राजेश कोटेचा हांणी सांगलें. अंदूं आयुष उपचारांचो वेव्हार 10 अब्ज डॉलरा मेरेन पावतलो.
ह्या वेळार आयुषमान कॉमीक पुस्तकाच्या तिसऱ्या आवृत्तीचे विमोचन जालें. भारताच्या परंपरीक वैजकी उपचारांच्या उदरगती खातीर जर्मनीच्या रोझेंबर्ग अकादमी ऑफ आयुर्वेद संस्थे कडेन कबलात केली.
देशाच्या आयुर्वेद वाठारांतली गुंतवणूक 2014त 3 अब्ज अमेरिकी डॉलर्स आशिल्ली. ही गुंतवणूक आतां 18 अब्ज अमेरिकी डॉलर्स मेरेन पावल्या. 2014 ते 2020 मेरेन आयुष उद्देगाची वाड दर वर्साक 17 टक्के जाली. भलायकी एक्स्पो प्रदर्शनांत 215 कंपनींचीं स्टॉलां आसात. 53 देशांतले प्रतिनिधी, विद्यार्थी, संशोधक आयुर्वेद काँग्रेसींत वांटेकार जाल्यात.
आयुर्वेद काँग्रेसीचो समारोप आयतारा 11 तारखेक जातलो. प्रधानमंत्री नरेंद्र मोदी समारोप सुवाळ्याक हाजीर रावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
