भांगरभूंय | प्रतिनिधी
-मनरेगा खाला सगळ्यांत चड पगार दिवपांत तिसरो क्रमांकपणजीः दरडोई उत्पन्नांत गोंयचो क्रमांक पयलो, आनी मनरेगा येवजणे खाला कामगारांक सगळ्यांत चड पगार दिवपांत गोंय देशांत तिसऱ्या क्रमांकाचेर आसा अशें केंद्र सरकारान सोमारा जाहीर केल्ल्या अर्थीक सर्वेक्षण अहवालांत नमूद केला.
‘मनरेगा’ येवजणे खाला काम करपी कामगारांक दरेका राज्यांत वेगवेगळे पगार दितात. फाटल्या वर्सा हरियाणा राज्यांत मनरेगाच्या कामगारांक दिसाक 357 रुपया पगार मेळ्ळो. हे वळेरेंत केरळाचो दुसरो क्रमांक आशिल्लो. थंय कामगारांक दिसाक 333 रुपया मेळटाले. जाल्यार गोंयांतल्या कामगारांक 322 रुपया पगार मेळ्ळो. हाचे भायर दर मनशाच्या उत्पन्नांत गोंय फुडें आसा असोय उल्लेख अहवालांत केला.
गांवगिऱ्या वाठारांतल्या नागरिकांक अर्थीक आदार दिवपा खातीर केंद्र सरकारान ‘मनरेगा’ येवजण सुरू केल्या. गोंय सयत देशभरांतले कोट्यांनी नागरीक हे येवजणे खाला काम करतात. गोंयांत ही येवजण ग्रामीण उदरगत खात्या वरवीं चालीक लायतात. पंचायत पांवड्यार वेगवेगळ्या सरकारी नोकऱ्यां खातीर थळाव्या लोकांची नेमणूक करतात आनी ताचे बदला पगार दितात. हे येवजणेक गोंयच्या गांवगिऱ्या वाठारांतल्या नागरिकांचो समाधानकारक प्रतिसाद मेळपाक लागला.
…………………………..
गांवगिऱ्या गरिबींत गोंयचो पयलो क्रमांक
मनरेगा खाला काम करपी कामगारांक गोंयांत दिसाक 322 रुपया मेळटात. देशांतलो हो तिसरो चड पगार आसलो तरी गांवगिऱ्या गरिबींत गोंय पयल्या क्रमांकाचेर आसा अशें सर्वेक्षण अहवालांतल्यान स्पश्ट जाता. गांवगिऱ्या वाठारांनी दर एक हजार नागरिका फाटल्यान 113 लोक बेकार आसात अशेंय अहवालांत नमूद केला.
————–गोंयांत म्हारगाय दर सगल्यांत उणो
केंद्र सरकारान जाहीर केल्ल्या अर्थीक सर्वेक्षण 2023-24 प्रमाण गोंयांत किरकोळ म्हारगायेचो दर फाटल्या वित्तीय वर्सा देशांत सगळ्यांत उणो आशिल्लो. 2023-24 वर्सा गोंयांत किरकोळ म्हारगाय दर 3 टक्क्यांचेर आशिल्लो. ताचे उपरांत अरुणाचल प्रदेश (3.2 टक्के), छत्तीसगढ़ (3.4 टक्के) आनी नागालँड (3.4 टक्के) आसा. दिल्लींतलो किरकोळ म्हारगाय वाडीचो दर केंद्रीय प्रदेशां मदीं सगळ्यांत उणो आसून तो 2.6 टक्क्यांनी आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.