भांगरभूंय | प्रतिनिधी
बाबुराव नायक: समिती वेंचून काडपाचो निर्णय चुकीचो; ट्रक धनयांक दवरले काळखांत
सांगें: दक्षीण गोंय प्रोग्रेसिव्ह ट्रक धनी संघटणेची कार्यकारिणी बरखास्त करून नवी कार्यकारिणी बिनविरोध वेंचून आयिल्ल्याची बातमी दिसाळ्यांनी छापून आयल्या. 19 जूनाक जाल्ले साबार बसकेची नोटीस खंयच्याच दिसाळ्याचेर वाचली ना. नवी समिती काडपाचो निर्णय चुकीचो आसा. ट्रक धनयांक काळखांत दवरून वेंचून काडिल्ली समीती आमकां मान्य ना अशें कुडचड्यार घेतिल्ले पत्रकार परिशदेंत ट्रक धनी संघटणेचे वांगडी बाबुराव नायक हांणी सांगलें. ह्या वेळार तांचे वांगडा ताराचंद्र नायक हाजीर आशिल्ले.
बाबुराव नायक हांणी मुखार म्हणलें की, जेन्ना 2017 वर्सा संघटणेची बसका जाल्ली, त्या वेळार नवी समिती वेंचपाची आशिल्ली. पूण दोन पंगड जाल्ल्यान समितीची निवड स्थगीत दवरली. त्या दोन पंगडां मदले एक आशिल्ले वल्लभ दळवी आनी दुसरे ज्ञानेश्वर नायक अशें तांणी सांगलें.
समिती वेंचपाची आसल्यार दोनूय पंगडांतले दरेकी तीन वांगडी घेवन समिती घडोवया असो आमी तांकां प्रस्ताव दिल्लो. पूण तांणी आमचें आयकलें ना. समितीच्यो ज्यो कितें तृटी आसात त्यो सुदारपाची गरज आशिल्ली. समितींत कोण वांगडी आसात हें कळोवपाची गरज आशिल्ली. तशी नोटीस दिसाळ्यांनी छापून येवंक जाय आशिल्ली. पूण अशें कांयच करिनासतना तांणी 19 जून 2022 दिसा नवे समितीची निवड केली. ही समिती आमकां मान्य ना असो आमी आक्षेप नोंद केला अशें बाबुराव नायक हांणी सांगलें.
रवींद्र भवनांत जेन्ना बसका जाल्ली ते बसकेंत वल्लभ दळवीन सांगिल्लें, चार वर्सांनी खणी बंद पडटल्यो. खणी जर बंद पडटल्यो जाल्यार समिती काडपाचो प्रस्नूच येना. खणी बंद पडटल्यो जाल्यार समिती कित्याक काडली असोय प्रस्न बाबुराव नायक हांणी केलो.
संघटणेच्या खात्यांत 6 लाख रुपया आसात अशें तांणी सांगिल्लें. त्याच पयशा खतीर तांणी ही समिती वेंचल्या असो खर आरोप बाबुराव नायक हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
