भांगरभूंय | प्रतिनिधी
जिल्होधिकाऱ्याचो आदेश : सैमीक उदका सांठ्यांचोय आस्पाव
भांगरभूंय । प्रतिनिधी
मडगांव : पावसाळ्यांत दक्षीण गोंयांत घसघशे, खण पीट, न्हंयो, तळयो आनी हेर उदका सांठ्यांच्या सुवातांक पर्यटक आनी थळावे लोक परतून परतून भेट दितात. कांय कडेन बुडपाच्यो घडणुको घडल्यात. ही समस्या लक्षांत घेवन दक्षीण गोंयांतल्या सैमीक उदका सांठ्यांच्या सुवातेर वचपाक फुडल्या 60 दिसां खातीर बंदी आसतली. हाचेर पुलीस आनी मामलेदारांनी लक्ष दवरचें, असो आदेश दक्षीण गोंय जिल्होधिकारी एग्ना क्लिटस हांणी जारी केला.
दक्षीण गोंय जिल्होधिकाऱ्यान शुक्रारा आदेश जारी करून दक्षीण गोंयांतले घसघशे, खण पीट, न्हंयो, तळी आनी हेर तशे तरेच्या सैमीक उदका सांठ्यांत पेंवप, न्हांवप वा प्रवेश करपाक मनाय केल्या. पावसाळ्यांत दक्षीण गोंय जिल्ह्यांतल्या विवीध सैमीक उदकां सांठ्यांक थळाव्या लोकां सयत पर्यटक परतून परतून भेट दितात. ताका लागून थंय बुडपाच्यो घडणुको घडटात. जिल्ह्यांतल्या पुलिसांनी सुचोवणी तकट्या वरवीं सादुरसाण बाळगुपाचे यत्न केल्यात. मात सैमीक उदकां सांठ्यांत प्रवेश करप चालूच आसा. उदकाची खोलाय, निसरट जाल्लो रस्तो, अचकीत वाडपी उदकाचो प्रवाह ह्या धोक्यांक लागून उदकांत देंवप धोक्याचें थारता. पोरूं सांगें, मुरगांव, धारबांदोडें ह्या सारक्या वाठारांनी बुडपाच्यो घडणुको घडल्यात. भौशीक सुरक्षेचो धोको लक्षांत घेवन जिवीतहानी टाळचे खातीर दक्षीण गोंय जिल्ह्यांतल्या सैमीक उदका सांठ्यांनी देंवपाक बंदी घालपाचो आदेश जारी करपाची शिफारस दक्षीण गोंय पुलीस अधिक्षकान केल्ली. ते प्रमाण दक्षीण गोंय जिल्होधिकाऱ्यान सैमीक उदका सांठ्यांत पेंवपाक, न्हांवपाक वा उदकांत देंवपाक बंदी आशिल्ल्याचो आदेश जारी केला. हो आदेश फुडल्या 60 दिसां खातीर आसतलो. ह्या काळांत आदेश मोडचो न्हय हे खातीर संबंदीत पुलीस निरिक्षक आनी मामलेदार हांणी नदर दवरची. आदेश मोडलो जाल्यार गुन्यांव नोंद करचो आनी न्यायदंडाधिकाऱ्या मुखार कागाळ दाखल करचो, अशें आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
