भांगरभूंय | प्रतिनिधी
फोंडें, प्रतिनिधी : कॉंग्रेस पक्षान आयज मेरेन लोकशायेक मान दिला. पूण पक्षाचे उमेदवारीचेर वेंचून आयिल्ल्या आमदारान पयशां खातीर देवाक विकून पक्षांतर केलें. तरीय लेगीत भाजपा लोकांक काळखांत दवरून येवपी लोकसभा वेंचणुकेंत स्वताचो फायदो कसो जातलो, हें पळयता. दक्षीण गोंयच्यान वेंचणूक लढोवपाक हांव तयार आसा. निमाणें पक्ष फुडारपणूच उमेदवार जाहीर करतले अशें आदले प्रदेशाध्यक्ष गिरीश चोडणकार हांणी म्हणलें.
लोकसभा वेंचणुकेचे फाटभुंयेर सध्या राजकी वातावरण बदलत आसा. सगले राजकी पक्ष वेंचणूक लढोवपाची तयारी करतात. हे खेपे दक्षीण गोंयच्यान वेंचणूक लढोवपाक आपूण इत्सूक आसा. सध्या मतदारांक भेट दिवन ताच्यो समस्या जाणून घेतां. पूण उमेदवारीचो निर्णय केंद्रीय फुडारपण घेतले. हाचे आदीं पणजी विधानसभा वेंचणूक आनी उत्तर गोंय लोकसभा वेंचणूक लढोवपाची संद निमाण्या खिणाक दिली. पूण वेळाच्या उणावाक लागून सगळ्या मतदारांक मेळूंक शकलों ना. हे खेपे दक्षीण गोंयच्यान वेंचणूक लढोवपाची तयारी सुरू आसा. सध्या भाजपान बेकारी वाडयतना गोंयची अर्थीक स्थिती इबाडल्या. केंद्र सरकार देशांत फूट घालपाचो यत्न करता अशें दिसता. तातूंत गोंयांत कर्मचारी भरती करतना घोटाळे आनी हेर घोटाळे उक्ताडार येतात. भाजपा सरकाराच्या निर्णयांचेर लोक उबगल्यात. हो राग लोकांक आसा आनी येवपी लोकसभा वेंचणुकेंत भाजपाक ताचो त्रास जातलो अशें गिरीश चोडणकार हांणी सांगलें.
विधानसभा वेंचणुकेंत कॉंग्रेस पक्षाक धक्को दिवपा खातीर भाजपान राज्य वेंचणुकेंत जायते राजकी पक्ष उबे केल्ले. विधानसभा वेंचणुकेंत भाजपाक मजत केल्ल्या एका पक्षाचो उमेदवार येवपी लोकसभा वेंचणूक लढोवपाचो यत्न करता. लोकसभा वेंचणुकेंत ९०% लोक कॉंग्रेस आनी भाजपा ह्या दोनूय पक्षांक मत दितले. उरिल्ले १० टक्के मतदार हेर पक्षांक मत दितले. विधानसभा वेंचणुके उपरांत देवाकूय विकपी कॉंग्रेस पक्षाच्या उमेदवारांक भाजपान व्हेले. ताचो राग जनतेक आसा. हो राग वेंचणुकेचेर काडपाची संद लोकांक मेळटली अशें चोडणकार हांणी फुडें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
