भांगरभूंय | प्रतिनिधी
दक्षीण आफ्रिका पंगडान इंग्लंडाचे भोंवडेक जैतान सुरवात केली. भारता आडची वन डे माळ वगडायल्या उपरांत इंग्लंड पंगड आफ्रिके आडची पयली मॅच लेगीत हारलो.
आफ्रिकेन चेस्टर ले स्ट्रीटांत खेळयिल्ले मॅचींत इंग्लंडाक 62 धांवड्यांनी हारोवन माळेंत 1-0 अशी आघाडी घेतली. आफ्रिकेन टॉस जिखून पयली बॅटींग करपाचो निर्णय घेतलो. मुखेल्याचो हो निर्णय रासी वेन डर ड्युसेनान योग्य सिद्ध केलो. ताणें शेंकडो मारून इंग्लंडाच्या बॉलरांक बॅकफुटाचेर धुकल्लो. ओपनर मलान केल्ले 57 धांवड्यांचे खेळीक लागून मेळिल्ले बरे सुरवातीक रासीन मुखार व्हेलो आनी 117 बॉलांनी 134 धांवड्यांची ताबडतोड खेळी केली. हातूंत 10 चवक्यांचो लेगीत आस्पाव आसा.
रासी खेरीत अॅडेन मार्करम हाणें लेगीत बरी बॅटींग केली. ताणें 61 बॉलांनी 77 धांवड्यांची आक्रमक खेळी केली. अखेरच्या ओव्हरींनी डॅव्हीड मिलरान 14 बॉलांनी नाबाद 24 धांवड्यो केल्यो. ताका लागून दक्षीण आफ्रिकेक 50 ओव्हरींनी 5 विकेटी वगडावन 333 धांवड्यांचो दोंगर उबारलो.
इंग्लंडा वतीन लियाम लिव्हिंगस्टोनान 2 विकेटी घेतल्यो. सॅम करन, मोईन अली आनी ब्रायडन कार्स हाणें दरेकी 1 विकेट घेतली.
मोखीचो फाटलाव करपी इंग्लंडाची सुरवात बरी जाली. ताच्या सुरवातीच्या तीन बॅट्समनांनी बरी बॅटींग करून पंगडाची आस्त जिवी दवरली. जेसन रॉयान 43, जाल्यार, बॅयरस्टोन 63 आनी जो रुटान 86 धांवड्यांचें योगदान दिलें. पूण, उपरांत इंग्लंडाचो डाव गडगडलो. हेर एकाय बॅट्समनाक इंग्लंडाक जैता मेरेन व्हरपाक शकलो ना. अशे तरेन ताचो डाव 46.5 ओव्हरींनी 271चेर सोंपलो.
आफ्रिके वतीन एनरीच नॉर्कियान सगल्यांत चड चार विकेटी घेतल्यो. शम्सी आनी मार्करम हाणें दरेकी दोन, जाल्यार एनगिडी आनी केशव महाराज हाका दरेकी एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
