भांगरभूंय | प्रतिनिधी
मडगांवः दक्षीण गोंयांत फाटल्या स म्हयन्यांत खूनाची 11 प्रकरणां नोंद जाल्यात. ह्या सगल्या प्रकरणांचो तपास करुन दुबावितांक अटक केल्या. हाचे भायर लैंगीक अत्याचाराच्या 20 परस चड प्रकरणांतय दुबावितांक अटक केल्या. दक्षीण गोंयांत खून, खून करपाचो यत्न, लैंगीक अत्याचार अशा गंभीर गुन्यांवांची शंबर टक्के तपास पुराय जाल्यात.
दक्षीण गोंय जिल्लो पुलीस गुन्यांवांचो योग्य तपास करतात. दरेका पुलीस स्टेशनांत सायबर क्रायम रिस्पोन्स सेल स्थापन केला. थंय नेमिल्ल्या पुलीस कर्मचाऱ्यांक प्रशिक्षण दिला. सायबर गुन्यांवांचो तपास करपा खातीर दक्षीण गोंयच्या दरेका पुलीस स्टेशनांत पुलीस उपनिरिक्षक आनी ताचे वांगडा हेर दोन कर्मचारी नेमल्यात. कागाळी मेळ्ळ्या उपरांत गुन्यांव नोंद करून तपास करतात. हावझींक कायदेशीर परवानगी नाशिल्ल्यान दक्षीण गोंयांत जंय जंय हावझी चलतात थंय पुलिसांक कायदेशीर कारवाय करपाची सुचोवणी पुलिसांक दिल्या अशी म्हायती दक्षीण गोंयचे पुलीस अधीक्षक टिकम सिंग वर्मा हांणी दिली.
वट्ट 432 प्रकरणांतल्यान 373 प्रकरणांचो तपास पुराय
दक्षीण गोंयांत जानेवारी ते जून ह्या स म्हयन्यांत भारतीय न्यायसंहितेच्या कलमा खाला सुमार 432 प्रकरणा नोंद जाल्यात. तातूंतल्या 373 प्रकरणांचो तपास पुराय जाला. ह्या गुन्यांवांत फटवणूक आनी चोरीच्या प्रकरणांचो आंकडो चड आसा. गंभीर गुन्यांवांचो तपास शंबर टक्के पुराय जाला आनी हेर 83 टक्के प्रकरणांचो तपास पुराय करुन दुबावितां आड कारवाय करपाक पुलिसांक येस आयलां अशी म्हायती वर्मा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
