दक्षिणेंतली आफ्रिका

भांगरभूंय | प्रतिनिधी

विश्व वळख

स्नेहा सबनीस

9923633789

अस्तंतेक नामीब आनी कलहारी रेंवट वाठार, उत्तरेक राना वाठार आशिल्ली आफ्रिका. दक्षिणेंतली आफ्रिका हाच्या उरफाटी. तेल, भांगर, हिरे आनी हेर माणकां-मोतयां मेळपी दक्षिणेंतली आफ्रिका. नामिबिया, मोझाम्बिक, अंगोला, लॅसुथू, दक्षीण आफ्रिका, झाम्बिया, झिम्बाब्वे आनी हेर देश हे दक्षिणेंतले आफ्रिकेंत आसपावतात. दक्षिणेंतले आफ्रिकेंत विंगड विंगड रानजीव आसात. शेती प्रधान असो हो वाठार.

उदका वाठार – ह्या प्रांताचे एके वटेन अटालांटीक म्हासागर आनी दुसरे वटेन हिंद म्हासागर आसा. झाम्बेझी ही ह्या वाठारांतली सगळ्यांत लांब न्हंय. ऑरेंज ही म्हत्वाची न्हंय अटलांटीक म्हासागराक मेळटा. ओकावांगो ही न्हंय हेर न्हंयां वरी म्हासागराक मेळना. ही न्हंय कलहारी रेंवट वाठाराक मेळटा.

दक्षीण आफ्रिका – दक्षिणेंतले आफ्रिकेंतलो म्हत्वाचो देश म्हणल्यार दक्षीण आफ्रिका. दक्षीण आफ्रिकेक तीन राजधानी आसात – प्रेटोरिया, ब्लूमफॉन्टेन आनी केप टावन. दक्षीण आफ्रिकेंत राष्ट्राध्यक्षाची राजवट. जोहॅनसबर्ग हें एक म्हत्वाचें शार. जोहॅनसबर्ग म्हणल्यार “भांगराचें शार.” ह्या शारांत भांगराच्यो जायत्यो खणी आसात. दक्षीण आफ्रिका हो देश भांगराच्या उत्पादनांत संवसारांत खूब मुखार आसा.

सॅन बूशमन – आफ्रिकेंतले हे आदिवासी लोक. जनावरांक मारून आनी जेवण-खाण सोदून जगपी अशे हे लोक. कलहारी रेंवट वाठारांत ‘सॅन’ लोक मेळटात. तांकां ‘बूश’ लोक अशें म्हणटात. आतां हे लोकूय स्थलांतरीत जावपाक लागल्यात.

नॅल्सन मंडेला – 1994 वर्सा नॅल्सन मंडेला हे दक्षीण आफ्रिकेचे पयले अश्वेत राष्ट्राध्यक्ष जाले. दक्षीण आफ्रिकेंत हाचे पयलीं वंशीय वाद मोट्या प्रमाणांत चलतालो. वंशा वेल्यान अश्वेत लोकांचो भेदभाव जातालो आनी पिडापीड जाताली. नॅल्सन मंडेला हांचो जल्मदीस ‘नॅल्सन मंडेला आंतरराष्ट्रीय दीस’ म्हणून पाळटात.

लॅसुथू – दक्षिणे वटेंतले आफ्रिकेंत उदक हें मोलादीक संसाधन. लॅसुथू देश आपल्या दोंगराळ भुंयेचो आनी वेगवेगळ्या न्हंयांचो खूब बरो उपेग करता. उदकाचो वेवस्थीत वापर जावचो म्हणून ह्या देशांत धरणां बांदल्यांत.

विक्टोरिया फॉल्स – झाम्बिया – झिम्बाब्वे शिमेर विक्टोरिया फॉल्म आसा. झाम्बेझी न्हंय 128 मिटर म्हणल्यार सुमार 420 फुटावेल्यान रुंद खाडयेंतल्यान सकयल पडटा. एका तेंपार, संवसारांतल्या सात आश्चर्यां पैकीं विक्टोरिया फॉल्स हें एक आश्चर्य आशिल्लें. उंचायेवेल्यान पडपी उदक आनी इंद्रधोणू पळोवंक जायते पर्यटक ह्या वाठाराक भेट दितात. उदकाचो ‘घसघस’ आवाज 40 किलो मिटर अंतरा मेरेन येता.

रानजीव – मडागास्कर हो जुंवो आफ्रिकेचे मुखेल भुंये पासून पयस गेलो. तेन्ना सावन ह्या जुंव्याचेर वेगवेगळे सस्तन प्राणी (mammals) मेळटात. लेमूर हो प्राणी रानवटी वाठारांत मेळपी हो एकूच वाठार अशें मानतात. रानजिवांच्या रक्षणा खातीर मोझाम्बिक, दक्षीण आफ्रिका आनी झिम्बाब्वे ह्या देशांनी अभयारण्या आनी इको-टुरिझम पार्क आसात.