भांगरभूंय | प्रतिनिधी
अग्रलेख
——————
फाटल्या तीस वर्सांच्या काळांत तर मेळत त्या मार्गान फक्त ‘खा - खा’ चालू आसा. विशेश म्हणल्यार सरकारी कामां जावचीं म्हूण कांय जाण.... ——————
धरलो तर चोर, नातर साव, अशें म्हणटात. म्हणजे जो मेरेन तुमची चोरी उक्ताडार येना तो मेरेन तुमी प्रामाणीक. पूण, तुमची चोरी धरली काय तुमी निमणे मेरेन चोर थारतात. कितलेय बदल्ले तरीय. अर्थांत आडवाद आसात. थोडे संद मेळून पसून बदलनात. आपल्याक जाय तेंच करतात. बुद्द शिकले तरी ते मूळ सभाव सोडिनात. सरकारी नोकरदारां मदीं हक्कान मागून खावपी वा मागिनासतना मेळटा तें बोल्सांत घालपी आसात. भ्रश्टाचारा आड खर कारवाय करपाचे सरकाराचे घोशणेक ते भियेनात. दक्षता खात्याच्या कांसवा गतीन चलपी कारभाराक लागून हे बेमान लोक मातल्यात. खाल्ल्या पानाचेर हळशीक करपाक लागल्यात. तांकां ना खेद, ना लज. गेंड्या परस दाट कात तांची.
सध्या सरकारी कर्मचाऱ्यां आड 68 गुन्यांव प्रकरणांचो तपास चलता. फाटल्या पांच वर्सांच्या काळांत फक्त एकूच कर्मचारी दोशी थारला, तर दोग निर्दोश. 2022, 2023 वर्सा एकूय गुन्यांव नोंद जावंक ना. पांच वर्सांत 16 गुन्यांवांचें आरोपपत्र दाखल जालां, तर 26 प्रकरणांचो निमणो अहवाल न्यायालयांत सादर जाला. आमदार एल्टन डिकाॅस्ता हांच्या प्रस्नाक मुख्यमंत्री डाॅ. प्रमोद सावंत हांणी ही लेखी जाप सादर केल्या. सारांश- हालींच्या वर्सांनी सरकारी प्रशासनांत भ्रश्टाचार, गैरप्रकार साप्प उणे जाल्यात. आॅल इज वेल. मळबांत देव आसा आनी धर्तरेचेर सगलें कितें बरें चल्लां, असोच हाचो अर्थ घेवपाचो?
आदल्या तेंपार नुस्त्याची गांथन, पणस, आंबे, अळंबी व्हरून दिलीं काय सरकारी कामां जातालीं. ताका साग्वाद म्हणटाले. अजूनय ही प्रथा चलता. पूण पयश्यां चेर वयर बोनस कशी! 40 वर्सां पयलीं उतर घाल्यार कामां जातालीं. पयशांक मोल येवंक नासलें. म्हारगायूय तितली नासली. बरें शिक्षण, वळख आसल्यार सहज नोकरी मेळटाली. भ्रश्टाचार उणोच आशिल्लो. मात, 1980 च्या सुरवेक तो किल्ललो आनी नकळटां पांच- धा वर्सां भितर ताचो रुख जालो. दुसऱ्याचें अनुकरण (वायट, चुकीच्या गजालींचें चड) करपांत आमचो हात धरपी कोण ना. एकलो खाता म्हूण दुसरो खावपाक लागलो. हातांत सत्ता आसा ते सगलेच ‘चिरीमिरी’ घेवपाक लागले. फाटल्या तीस वर्सांच्या काळांत तर मेळत त्या मार्गान फक्त ‘खा – खा’ चालू आसा. विशेश म्हणल्यार सरकारी कामां जावचीं म्हूण कांय जाण स्वताच टक्केवारी दितात. सुटकेसी पावयतात. कांय लोकप्रतिनिधीय नोकरी दिवपाक पयशे घेतात. ह्यो ऐकीव गजाली न्हय. खुद्द कांय राजकी फुडाऱ्यांनीच दुसऱ्या फुडाऱ्यांचेर हे जाहीर आरोप केल्यात. लोकप्रतिनिधीं आड कागाळ करपाक गोंयकार एकवेळ भियेंतले, पूण सरकारी अधिकाऱ्यांचेर पुराव्यान आरोप करपाक ते फाटीं फुडें जावचे नात. दक्षता खात्यान ह्यो कागाळी बेगीन हाता वेगळ्यो करच्यो. नाजाल्यार हाचे मुखार कोण कागाळीच करचो ना.
हें जालें भ्रश्टाचाराचें, पूण सरकारी कामां जावपाक उशीर जाता, ताचें कितें? सादी एक सही घेवपाक आदेस पिड्ड्यार करचो पडटा. अमूक काम थारावीक वेळा भितर जावपाकूच जाय, अशे आदेश अदीमदीं भायर सरतात. पूण सरकारी कर्मचारी, अधिकारी ते कोयराच्या बास्केटांत उडयतात आसतले. वेळार काम करपी कर्मचारी मेजकेच. रेशनकार्ड, दाखले पसून काडपाक उण्योच दोन तरी फावटी मारच्यो पडटात. काणकोणच्यान पणजे येवप आनी परत वचप म्हणल्यार कितलो त्रास तें त्या मनशाकूच खबर. फाल्यां यो, सांगपाक त्रास पडनात. सरकारी यंत्रणांनी, बिगर सरकारी संघटनांनी ह्या कामांचे मुजतीचेर लक्ष दवरून सरकारी कर्मचाऱ्यांक जाब विचारपाक जाय. सरकारी कर्मचारी, अधिकारी हो लोकांचो सेवक, नोकर हें कोणें विसरचें न्हय. लोकांच्या बोल्सांतल्यान ताका पगार मेळटा. भरपूर सुटयो मेळटात. मागीर ताणें उमेदीन, आनंदान फटाफट कामां करपाक नाका? नम्रपणान उलोवपाक नाका?
सरकारी कर्मचारी वेळार कामाक येतात काय नात, हें पळोवपाची स्टंटबाजी केन्नाय जाता. ती दर सप्तकाक जावची. पंचींग मशीन बसोवचें. निदान थोडे तरी कर्मचारी भियेवन वेळार कामार येतले. सक्तीची व्हीआरएस जाहीर जाल्ली, तिचें कितें जालें? सरकारी जांवय, सुनो आसात तांची बदली करची. सगलेच कर्मचारी, अधिकारी कामचुकार, मनमानी, भ्रश्टाचारी नात. बरे लोक आसात, म्हूण प्रशासन चलता. पूण सुक्या वांगडां ओलेंय जळटा. दक्षता खात्यान आनी हेर सरकारी यंत्रणांनी आतां आपल्या कारभाराक वेग हाडचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
