भांगरभूंय | प्रतिनिधी
कोंकण रेल्वे अजून 6 स्टेशनांचेर ही सुविधा उबारतले: झा
म्हापशें: थिवी रेल्वे स्टेशना वयल्या एक्झिक्युटिव्ह लाऊंज ही प्रवासी वर्गा खातीर सुविधा सुरू जाल्ल्यान कोंकण रेल्वचें सपन साकार जालां. ही कारवार आनी रत्नागिरी मेळून वट्ट स रेल्वे स्टेशनांचेर विवीध अत्याधुनीक सुविधां सयत सेवा उपलब्ध करतले. जाल्यार मडगांव रेल्वे स्टेशनार पॉड हॉटेलाची सुविधा येता त्या एप्रील मेरेन सुरू जातली अशी घोशणा कोंकण रेल्वेचे ऑपरेशन्स अॅण्ड कमर्शिअल्स विभाग संचालक संतोष कुमार झा हांणी केली.
बिरेस्तारा सांजवेळा रेल्वे प्रवाशांक उत्कृश्ट अणभव आनी बरी सेवा दिवपाच्या यत्नांचो एक भाग म्हूण थिवी रेल्वे स्टेशनार उपलब्ध केल्ल्या एक्झिक्युटिव्ह लाऊंजचें झा हांचे हस्तुकीं लोकार्पण जालें.
ह्या वेळार कोंकण रेल्वेचे बाळासाहेब निकम, जोजफ ई जॉर्ज आनी हेर अधिकारी आनी लाऊंजचे वेवस्थापकी पंगड हाजीर आशिल्लो. कोंकण रेल्वे कॉर्पोरेशन लिमिटेडान ही सेवा उपलब्ध केल्या.
हो एक्झिक्युटिव्ह लाऊंज 84.10 चौमि त व्यापिल्लो आसा. हांगा सोफा, रिल्किनर खुर्च्यो, उजवाडाची वेवस्था, सॉफ्ट म्युझीक, कॅफेटेरिया आनी पर्यटक येवकार कक्षा सयत उत्कृश्ट सेवा आनी सुविधा उपलब्ध करून दिल्यात. तशेंच 37 लक्झरी आसनां सयत पूर्ण वातानुकुलीत सुवात, फुकट हाय स्पीड वायफाय, वाचन गॅलरी, रेल्वे गाडयांची म्हायती डिस्प्ले, पर्यटक येवकार केंद्र, वर्कस्टेशन, मोबायल चार्जिंगेची वेवस्था, यादस्तीक स्टोर, टीवी पळोवपाचें केंद्र ह्या थळार आसा.
ह्या एक्झिक्युटिव्ह लाऊंजांत दोन वरां खातीर किमान शुल्का सयत 50 रुपया प्रवेश फी मनशा फाटल्यान आसतली. तशेंच वैयक्तीक वापराचेर आधारीत अतिरिक्त शुल्क लागू आसतलें.
झा हांणी मुखार उलयतना सांगलें, आमी थिवी रेल्ले स्टेशनार रॅस्टोरंण्टा खातीर निविदाय काडल्या. येता त्या मार्च मेरेन तें तयार जातलें. दीसपट्टे 5 ते 7 हजार लोकांचें यो-वच आशिल्ल्या ह्या रेल्वे स्टेशनार प्रवाशांच्या फायद्या खातीर पे-पार्कींग आनी हेर सुविधा प्रकल्पां सयत हेर सुविधाय विकसीत करतात. तातूंतलीच वयली सुविधा आसा अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
