थळाव्यांक रोजगारा खातीर माची उपलब्ध

भांगरभूंय | प्रतिनिधी

शुभांगी वायंगणकारः म्हापशें मार्केटांत महिला मंडळां खातीर खास दालन

भांगरभूंय । प्रतिनिधी

म्हापशें: राज्य सरकारान स्वयंपूर्ण चवथीचो बाजार ही थळाव्यांक रोजगारा खातीर एक माची उपलब्ध करून दिल्या. ह्या बाजारांत चवथी खातीर लागपी सगळे तरेची मिठाय, फुलां आनी हेर सामान विकपाक दवरलां. ह्या बाजारांत सुमार 25 स्टॉल्स आसात अशें म्हापशेंची नगराध्यक्ष शुभांगी वायंगणकार हांणी सांगलें.

लोकांक घरगुती परंपरीक मिठाय, फुलां, माटोळी आनी हेर वस्तू विकपा खातीर सरकारान 20 ऑगस्ट सावन राज्यभर स्वयंपूर्ण चवथीचो बाजार मांडला. शेनवारा म्हापश्यां सरकारी संकुलाच्या आवारांत सुरू केल्ल्या ह्या बाजाराचें उक्तावण केले उपरांत नगराध्यक्ष वायंगणकार उलयताली.

ह्या वेळार ह्या उपक्रमाचे नोडल अधिकारी वासुदेव शेट्ये, पालिका मुख्याधिकारी सीताराम सावळ, कृष्णकांत पांगम, अक्षय पोटेकार आनी हेर अधिकारी, नगरसेवक तशेंच हेर मानेस्त हाजीर आशिल्ले.

हो बाजार फुडले 10 दीस म्हणल्यार 30 ऑगस्ट मेरेन उक्तो आसतलो. महिला स्वयंसहाय्य गटां खातीर म्हापशें पालिका मार्केटांत शकुंतला पुतळ्या कडेन रोखडेंच खाशेलें दालन दितले. थंय बायलांक चवथी खातीर लागपी सामान विकपाक मेळटलें, अशें नगराध्यक्ष वायंगणकार हांणी सांगलें. वासुदेव शेट्ये हांणी सांगलें, चवथी निमतान लोकांक रोजगारा खातीर माची मेळची, हे खातीर पुराय राज्यभर हो स्वयंपूर्ण चवथीचो बाजार सुरू केला. राज्यांत 25 कडेन हे बाजार सुरू जाल्यात. ह्या उपक्रमाक बरो प्रतिसाद मेळ्ळो जाल्यार फुडारांत दिवाळी आनी नातलां ह्या सारक्या सणां वेळार अशे तरेचे उपक्रम हातांत घेतले.

28 ऑगस्टाच्यान माटोळी बाजारः शेट्ये

स्वयंपूर्ण चवथीच्या बाजारा सारकिल्ल्या उपक्रमांतल्यान संबंदितांक रोजगारा खातीर माची मेळटली, तशेंच वेवसायाचें प्रशिक्षण लेगीत मेळटलें. नव्या बसस्टॅण्डाच्या आवारांत माटोळीच्या बाजारा खातीर विशेश बाजार सुरू करतले. 28, 29 आनी 30 ऑगस्ट अशे तीन दीस हो बाजार भरतलो. ह्या दालनांतल्या स्टॉल्सां खातीर विक्रेत्यां कडल्यान सरकार कसलेंच शुल्क घेना, अशें नोडल अधिकारी वासुदेव शेट्ये हांणी सांगलें.