भांगरभूंय | प्रतिनिधी
भांगरभूंय । प्रतिनिधी
वास्कोः पंचायत मंडळांनी लोकां कडल्यान येणे आशिल्ली घरपट्टी आनी हेर थकबाकी वसुली केली ना जाल्यार ताका सरकारा कडल्यान अतिरिक्त निधी दिवपाचें बंद करतले अशी शिटकावणी पंचायत मंत्री माविन गुदिन्हो हांणी दिल्या. सोमाराक बोगमळो पंचायत मंडळाचे बसकेंत ते उलयताले. पंचायतींचें काम बरे बशेन चलपाक जाय जाल्यार नेमान करचे, अशें आवाहन तांणी केला.
लोकांक सगळ्यो नागरी सुविधा जाय आसतात. मात घरपट्टी आनी हेर कर भरपाक मात ते फाटीं रावतात. अश्या लोकां आड कारवाय करपाक आपणे नव्यान वेंचून आयिल्ल्या पंचायत मंडळांक सांगलां. लोकांनी कर भरले ना जाल्यार तांकां जाय आशिल्लीं प्रमाणपत्रां दिवपाचें बंद करात अशें आपणे तांका सांगलां अशें माविनान सांगलें.
थकबाकी वसुलीक पंचायत मंडळांनी प्राधान्य दिवपाक जाय. ते बगर तांकां सरकारी निधी दिवपाचो काय ना, हाचो विचार करपाचो वेळ आयला. सरकारी निधीचेर पंचायतीचो कारबार कितलो तेप चलतलो. अर्थीक नदरेन सक्षम जावपाक जाय जाल्यार पंचायत मंडळानी थकबाकी वसुलीचेर लक्ष दिवपाक जाय आनी लोकांनी प्रामाणीकपणान कर भरपाक जाय, अशें तांणी सांगलें.
बोगमोळो हांका शॅक चलोवपी एकल्यान बोगमोळो पंचायत मंडळान आपूण कर भरचो ना, खंयच्या अधिकारांत शॅकवाल्यां कडल्यान कर घेतात अशें तांणे विचारलां. पंचायती कडल्यान सगल्यो सुविधा घेवन कर भरपाक न्हयकार दिवपी ह्या शॅकवाल्याचेर खर कारवाय करपाची शिटकावणी गुदिन्हो हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
